Gidasmagan sa motor kritikal

CEBU, Philippines - Kritikal  ang  kahimtang  sa   batang  lalaki  human  kini  dasmagi  sa motorsiklo  samtang naglakaw daplin  sa karsada    didto sa barangay Lambog, lungsod sa Badian sa milabayng Sabado sa alas 12:00 sa udto.

Samtang  ang  drayber  sa motorsiklo  ug  duha  ka angkas niini  nangaangol usab.

Ang biktima mao si Welmar Obispo, 6, ug molupyo sa maong lugar.

Ang drayber sa motorsiklo  nga wala’y  plate number, usa ka   menor de edad  nga giila  sa kapolisan  nga  si Rammy Estaniel, 13, samtang   ang duha niini ka  angkas mao  sila si Ervin Quinones, 15, ug Rannie Alvares, 12, nga pulos  taga  Lambog.

Si PO3 Emilio Carungay sa Badian Police Station mibutyag sa Banat News  nga ang  6-anyos  nga  biktima  naglakaw daplin sa karsada   nga  gisunod  sa  motorsiklo  nga  nagpaingon  sa lungsod  gikan sa barangay Lambog.

Apan pag-abot sa maong  lugar nakaligis  og  sanga sa kahoy ang motor   busa  nawad-an  na  og  control  ang  drayber ug  sa pagsaliring  niini  didto  mahipunta  sa  naglakaw  nga  biktima.

Natumba ang biktima   ug  nalatayan pa gyud  sa mga ligid sa  motorsiklo nga miresulta sa pagkalamba niini  samtang  nangalagpot  usab ang  drayber  ug  ang  duha  ka angkas  niini.

 Ang  upat  ka  angol gihatud  dayon  sa  mga  nakasaksi  ngadto  sa Badian District Hospital apan  si Obispo  nga  talandugon  ang  kahimtang  gilahos  sa tambalanan  sa dakbayan  sa Sugbo. Ang drayber sa motor mitahan   dayon  sa kapolisan   apan  tungod  kay menor  de  edad  gi-turn -over kini  ngadto sa  buhatan sa  Department of Social Welfare and Development (DSWD). (BANAT NEWS)