Tanod namaligya’g shabu priso

CEBU, Philippines - Duha ka mga lalaki usa niini kanhi tanod nga gidudahang namaligya  og   gidiling drugas nadakpan  didto sa highway sa barangay Don Virgilio Gonzales, lungsod sa Medillen niadtong Sabado sa alas 10:00 sa buntag.

Ang nadakpan  mao sila si Vicente Sumpoc, 61, usa ka kanhi  tanod sa maong lugar,  ug   Rico Bucayan, 41 , minyo,  nga  taga  Pelaez St. dakbayan sa  Bogo.        

Ang nakadakop nga polis mao si PO2 Cleo Bohol, hingkod nga  nagpuyo sa  maong lugar apan nadistino  sa lungsod sa Daanbantayan.

Si SPO3 Eufrocino Aguisandar, desk officer sa Medillen Police  Station  mibutyag sa  Banat  News  nga  si PO2 Bohol nag-atang og kasakyan pa-ingon sa iyang duty niadtong  tungora.

Dihang  nasaksihan  niini  ang  duha ka suspek kinsa  wala makamatikod nga polis  siya  kay  nagsul-ob  man  siya  og  sinibilyan, nga si Sumpoc  mitunol  og tulo ka sachet nga  gituohang  shabu ngadto  ni Bucayan dungan  ang pagdawat niini sa  bayad nga  P500. 

Giduol  dayon  kini ni PO2 Bohol kinsa   nagpailang polis uban sa mando  nga  dili  sila  palihukon .

Busa  dihadiha  gisakmit  ni PO2  Bohol  ang  tulo  ka gagmay’ng  putos  sa gituohang  shabu  ug  ang  P500  nga silbing  bayad  niini.

Iya  dayon  kining  gipangdakop  ug gitugyan  ngadto  sa kapolisan sa Medillen.

 Karong buntag   gitakdang  pasakaan kini  og  kaso. (BANAT NEWS)