Sapatero gipusil patay
CEBU, Philippines - Patay ang usa ka sapatero human kini gipusil sa wala mailhing kriminal niadtong Sabado sa hapon diha sa iyang pwesto sa barangay South Poblacion, lungsod sa San Fernando.
Ang biktima giila sa mga polis nga si Antonio Enad Taper, 57-anyos taga barangay Basak nakaangkon kini og duha ka samad pinusilan sa iyang ulo ug daling gidala ngadto sa Carcar Provincial Hospital apan pila ka oras ang nakalabay nakabsan kini sa iyang kinabuhi diha sa maong tambalanan.
Si Senior Inspector Gerard Ace Pelare, hepe sa San Fernando Police Station nagkanayon nga si Taper nag-ayo og sapatos dihang miabot ang usa ka wala mailhing lalaki ug mipusil kaniya.
Walay bisan usa nga tawo diha sa palibot ang nakakita sa krimen. Apan usa sa gisubay sa imbestigasyon ang kabahin sa “love triangle†nga anggulo tungod kay ang kapuyo karon ni Taper giingong minyo sa laing lalaki ug nagkabuwag lang niadtong tuig 2007.
Si Pelare nagkanayon nga laing motibo nga ilang gilantaw mao ang personal nga bangi tungod kay giingong nanion og pusil niadtong milabay’ng eleksiyon ang biktima.
Giingong ang bana sa kapuyo ni Taper lumad nga taga Danao hinungdan nga gisusi sa kapolisan ang background niini. (BANAT NEWS)
- Latest
