Freezer van nga gikarnap ug gihimong getaway sa 2 ka tulisan vehicle na-recover

CEBU, Philippines - Human sa duha ka semana nga pagpangita sa kapolisan sa gihimong get-away vehicle sa mga kawatan nga mitulis sa usa ka Korean restaurant ug travel agency narekober na ang freezer van sa Assi Mart diha sa sitio Santo Niño sa barangay Mabolo.

Pasado alas-6 sa Sabado sa gabii, nakadawat og tawag ang kapolisan sa Mabolo kalabot sa gi-abandonar nga freezer van sa maong dapit nga adunay plakang LNJ-113.

Matud pa ni PO2 Enrique Manolo, sa Mabolo Police nga walay tawong nakakita kun si kinsa ang nagbilin sa maong sakyanan ug giingong taud-taud nang wala’y migamit sa maong sakyanan hinungdan nga gi-report kini sa kapolisan. Dugang pa ni Manolo nga padayon pa karun ang ilang pagpahigayon og imbestigasyon sa mga tulisan nga midala sa van ug mitulis sa Assi Mart.

Kahinumduman nga niadtong Mayo 22 ning tuiga, gisulod sa duha ka lalaking nag-hood nga mga lalaki ang Assi Mart ug gitulis ang kahera niini ug gisulod sa kasilyas uban sa iyang kauban ug gwardiya.

Gawas sa tindahan, gitulis sab nila ang Yeson Travel Agency, ug nadala ang gibanabanang  P100 mil nga kwarta.

Nakuhaan sa CCTV camera ang duha ka tulisan nga namalit pa niadtong tungora og noodles apan wala kaayo maklaro ang hulagway tungod usab kay nagsuot sila og hood.

Sa pagkakaron ang kapolisan sa Mabolo ug Theft and Robbery Section nagtinabangay sa pagsubay sa mga tulisan. (BANAT NEWS)