Gipaabot nga ipanghatag na sa DepEd ang notebook

CEBU, Philippines - Gipaabot nga  ikahatag na  sa Department  of Education (DepEd)  ang  mga  notebook  sa Kapitolyo  karong  semana  ngadto  sa  mga  estudyante  sa mga  tunghaang  publiko  sa tibuok  lalawigan.

Kini  human  ikatugyan  ni  acting  governor  Agnes  Magpale  ang  maong  mga  notebook  ngadto  sa DepEd nga  dugay  na  nga  napundok  sa bodega  sa Kapitolyo.

Ang pagtugyan  sa maong  mga  butang  ngadto  sa DepEd  nahimo  human  mihatag  og  sinyas  ang   Department of Interior and Local Government  (DILG) kang  Magpale  aron  kini ikadistribuwer  na  ngadto  sa  mga  estudyante.

Matud pa  ni  Magpale  nga  sayo  niini   nagpadala  na  siya   og suwat kang DILG Secretary  Manuel Roxas niadtong Mayo 24 bahin sa usa ka milyon  ka  mga  notebook  nga  napundo karon  aron  ipanghatag  na  sa  kabataan  nga  motungha  sa tunghaang  publiko  niining tuiga  sa tibuok  lalawigan.

Ang  maong  mga  notebook  may    hulagway sa kanhi gobernadora, mga  sakop  sa hunta  probinsyal ug  ni anhing bise  gobernador   Gregg Sanchez.

Miingon  si Magpali  nga  wala  madistribuwer  ang  maong  mga  notebook  kaniadto  tungod  kay  nagkaaway  si  Garcia  ug  si  Sanchez.

Matud ni Magpale nga mas maayo og ikahatag na kini karong semanaha gumikan kay magsugod  na ang  klase aron magamit  kini  sa  mga  estudyante  sa elementary  ug  bisan  sa high  school. Gianugonan  si  Magpale  tungod  kay  matud  niya nangadugta  na  ang  uban niini  sa kadugay  nga  napundo  sa bodega  sa Kapitolyo.

Matud ni Magpale nga  ang  maong  mga  notebook  gigahinan  sa kagamhanan  og  kapin  sa P4 milyones.       WC (BANAT NEWS)