Pres. sa Talisay College gisuspenso

CEBU, Philippines - Gipaubos sa 30 ka adlaw nga preventive suspension ang presidente sa Talisay City College nga si Dr. Tomas Ramos tungod sa giingong nahimong kalapasan niini kabahin sa pagpangolekta og school fees nga wala’y mga resibo ug wala i-remit ngadto sa city treasurer.

Kahinumduman nga base sa report sa Audit Observation Memorandum sa Commission on Audit nga dunay petsa niadtong Marso 1, 2013 nasuta nga ang TCC nangolekta kini og school fees nga wala moisyu og resibo.

Sa gipahigayon review sa AOM niadtong Disyembre 31, 2012 nahibaw-an nga mikabat ngadto sa P10, 553, 270 ang nakolekta sa TCC sukad pa niadtong school year 2008-2009 ug hangtud 2012-2013.

Ang TCC usa ka pampublikong tunghaan nga gidumala sa siyudad sa Talisay ug giingong wala usab i-remit ni Ramos ngadto sa city treasurer ang kwarta nga nakolekta ug gawas niini giingong si Ramos mipagawas og kwarta gikan sa maong pundo nga wala’y approval sa Board of Trustees (BOT). Niadtong Mayo 24, 2013 si Mayor Socrates Fernandez kinsa maoy chairman sa BOT miluwat kini og preventive suspension batok kang Ramos sulod sa 30 ka adlaw samtang gipaubos pa siya sa imbestigasyon. Ang maong preventive suspension nagsugod na kini niadtong Mayo 27, 2013.

Ubos sa rekomendasyon sa COA ang BOT migama kini og committee nga maoy mopahigayon og imbestigasyon sa maong problema.

Si Konsehal Dennis Basillote, chairman sa committee on education sa konseho sa siyudad ug miyembro sa BOT mibutyag nga si Ramos wala makapresentar og program of works ug mga resibo sa giingong gihimo niining proyekto alang sa TCC. Matud ni Basillote nga mga hulagway lang sa proyekto ang gisubmitir ni Ramos ngadto sa BOT apan wala’y mga supporting documents sama sa resibo ug program of works.

Gikompirma usab ni Basillote nga wala’y kalibutan ang BOT kabahin sa pagpangolekta ni Ramos og mga school fees ug wala usab sila kahibawo kung asa na paingon ang nakolektang kwarta tungod kay wala man kini i-remit ngadto sa city treasurer. (BANAT NEWS)