Hunyo may 2-3 ka bagyo–Pagasa

CEBU, Philippines - Adunay  duha  ngadto  sa tulo ka bagyo  ang  gitakdang  mohugpa  sa nasud  niining  buwan  sa Hunyo  sumala  sa mga  tinugyanan  sa panahon.

Si  Engr. Alfred F. Quiblat,  OIC  Chief  sa Philippine  Atmospheric  Geophysical  and  Astronomical  Services  Administration (PAGASA) Mactan mibutyag  sa Banat News  nga  wala  masayri  kun  asa  rumbo  ang  maong mga  bagyo. Bahin  sa  mga  ngalan  ning maong  mga bagyo,  unya  na  kini  ikaluwat  kun  mosulod  na  sa  Philippine Area  of  Responsibility (PAR), sumala  ni  Quiblat.

Midugang  siya  nga  ang  ikatulong  bagyo  nga nasinatian  sa nasud  ning  tuig  2013   mao  ang  Crising  niadtong  Febrero 18.

Si Quiblat  miingon   nga  ang  nasud  duawon  sa  18  ngadto  sa 19 ka bagyo  matag  tuig  ug  ang  panahon  nga  labing  daghan  og  bagyo  mao  ang tinghabagat  ug  tinguwan.

Matud  niya nga  kini  maggikan  sa  buwan  sa  Hunyo  hangtud  sa Disyembre  nga  maoy  kasagarang  tingkusog  sa uwan  ug  tingbugnaw  sa panahon.

Nagkanayon usab  si Quiblat  nga sa panahon  sa  hanging amihan  nga   ting-init,  dili kaayo  makahuygo  ang  bagyo  gumikan s a kainit  sa   panahon.

Gumikan  niini  giawhag  ni  Quiblat ang publiko  nga  magbantay  kanunay  gikan sa  baha  ug  landslide.

Matud  niya  nga sa panahon  nga  adunay  bagyo  dali  ra  manahili  ang  yuta  tungod  kay  kusog  ang  lihok  sa mga  gamot  sa kahoy  nga  matandog  sa  inig hapak  sa hangin.

Busa   gipasidan-an ni Quiblat  ang  mga  nanagpuyo  sa mga  bakilid  ug  daplin  sa kasapaan  maoy magbantay  kanunay  aron  makalikay  sa dagkong  kadaot  gumikan  sa landslide  ug  sa  baha.

Labaw  sa tanan  matud  niya  nga bantayanan  kaayo  ang  kabataan  nga  moeskuyla  sa  mga  adlaw   nga  dili  maayo  ang  kahimtang  sa  panahon. (BANAT NEWS)