Not guuilty–Joavan
CEBU, Philippines - Wa angkona o mi-plead not guilty si Joavan Fernandez sa tulo ka mga kaso nga gipasaka batok kaniya human siya madakpi niadtong miaging Mayo 20 didto sa Moalboal habagatang bahin sa Sugbo samtang padung untang moikyas paingon sa Negros.
Kagahapong adlawa nahinayon ang arraignment sa iyang tulo ka mga kaso diha sa Regional Trial Court Branch 10 bisan pa og wala ang iyahang abogado nga si Atty. George Bragat.
Kahinumdoman nga wala mahinayon ang miaging arraignment ni Joavan niadtong miaging Mayo 24 human wala motungha ang iyahang abogado nga si Atty. Paulino Labrado apan gihatagan kini og laing higayon ni Judge Soliver Peras nga ipahigayon pag-usab ang arraignment kagahapong adlawa.
Gibutyag kagahapon ni Joavan nga si Bragat ang bag-ong abogado ug dili na si Labrado kay kini ang ilahang naandan na nga abogado.
Si Mayor Socrates Fernandez sa dakbayan sa Talisay mianha usab kagahapon atol sa arraignment ni Joavan aron mosaksi niini.
Tungod kay wala man ang abogado sa iyahang anak, mihangyo kini mismo sa laing duha ka abogada nga anaa sulod sa korte nga sila si Atty. Gina Clarus Sumbe ug usa ka abogada nga wala mohatag sa iyang tibuok nga pangalan gawas lang sa Atty. Tiu nga mao ang mo-arraign sa iyahang anak.
Matud ni Sumbe nga maong wala si Bragat tungod kay duna kini importanteng lakaw apan ang beteranong abogado gihapon maoy morepresentar kang Joavan sa preliminary hearing sa Hunyo 11 ug retrial sa Hunyo 18.
Ang mga kaso nga giatubang karon ni Joavan mao ang kalapasan sa Comelec gun ban, illegal possession of firearms, ug illegal possession of explosive. (BANAT NEWS)
- Latest
