CPDRC di lang una modawat og mga priso
CEBU, Philippines - Ipahunong una sa Cebu Provincial Detention and Rehabilitation Center (CPDRC) ang pagdawat og dugang mga piniriso gikan sa kalungsuran sugod niadtong Mayo 27, 2013.
Giaprobahan ni Bise Gob. Agnes Magpale, nga mao karon acting governor sa lalawigan ang suwat ni acting CPDRC Warden Romeo Manansala alang sa mga buhatan sa kapolisan sa kalungsuran.
Matud pa ni Manansala, sobra na sa minimum nga kapasidad nga 1,400 ka piniriso ang CPDRC tungod kay karon aduna na kini 1,684 ka piniriso.
Giawhag ni Manansala ang kapolisan sa kalungsuran nga mananghid una sa buhatan sa gobernador kung aduna sila’y dad-on nga piniriso sa CPDRC. Lakip sa ilang gipahibawo ang mga mayor sa kalungsuran. Ang mga bilanggoan nga anaa sa mga dakbayan ubos kini sa pagdumala sa Bureau of Jail Management and Penology.
Ang maong problema mitumaw usab sa sayong bahin sa tuig 2010 diin nisuway usab ang Kapitolyo sa pagbalibad og mga piniriso nga dalhon sa CPDRC.
Gani tagduha na lang ka piniriso ang ilang dawaton gikan sa matag buhatan sa kapolisan sa kalungsuran.
Ang maong pamaagi gireklamo sa pipila ka police stations sanglit sila man ang mahasol ug makagasto sa pagpakaon sa mga piniriso.
Modawat lang ang CPDRC og mga piniriso kung maibanan ang sulod niini kung dunay dad-on sa National Penitentiary sa Muntinlupa City. (BANAT NEWS)
- Latest
