Dalaga nagpamasahe gihinol

CEBU, Philippines - Andam mopasaka og kaso ang usa ka babaye nga medical student nga nabiktima sa pang-abuso sa usa ka masahista atol sa iyang pagpamasahe sa usa ka parlor sa  I.T. Park, sa barangay Lahug ning dakbayan  sa miaging  Lunes  sa gabii.

Ang biktima  giila  lang  sa  ngalan  nga  “Mary” (di tinuod  niyang  ngan), 21, ug taga Lucena City, Quezon Province.

Giila usab ang  suspetsadong  masahista nga si Agustin Romanillos, 30, ulitawo, nga taga Sugbo Homes, Nivel Hills,  sa Lahug.

Matud pa ni Atty. Aaron Pedrosa, abogado  sa biktima  nga gikang  mibakasyon  sa Daanbantayan ang biktima ug niadto  lang  Lunes mianhi  dinhi sa dakbayan  kuyog  sa iyang  amiga.

Sa kakuryoso sa biktima nga magpamasahe tungod kay wala pa makasuway, miadto  kini  sa usa  ka  parlor  sa I.T. Park ug  mitilaw  kun  unsay  lami  sa  pamasahe sa hapit  nang alas  12:00  ang  takna  sa kagabhion  kuyog  sa iyang  amiga.

Gani  hapit  na manira  ang  maong  parlor  apan  ang  suspetsado  nga  naglingkod  sa front  desk  sa maong  establisemento maoy mitanyag  nga  momasahe.

Diha-diha  gipasulod  ang biktima  sa usa ka private room diin  giingong   gipahubo   sa suspek  ang  iyang  senina  sa ibabaw nga bahin  sa lawas lakip  na  ang  iyang bra,  dayon  gitunolan  siya  og  tualya nga  gitabon  sa iyang  hubo  nga  lawas.

Matud  pa  sa  biktima  nga  gipahigda siya  sa kama sa suspek  unya  gisugdan  dayon  og  hinol  sa suspetsado  ang  importanteng  mga  bahin  sa iyang  lawas busa  mihiwasa  siya, mibangon  ug  miundang  sa pagpamasahe. 

Paggawas sa biktima nangutana siya sa iyang amiga kung unsa gyud diay ang foot and back massage ug didto nasayran sa biktima nga dili na mao ang gibuhat sa masahista  kaniya.

Ang manag-amiga daling miadto sa Mabolo Police Station apan imbis nga sila tabangan, giingong gibugal-bugalan  hinuon kini sa mga polis.

Gumikan  niini gitakdang mopasaka og kaso ang biktima sa kasong kriminal alang sa masahista, kasong civil alang sa tagdumala sa parlor ug lakip nang kasohan sa kasong administratiba ang kapolisan sa Mabolo Police Station kinsa giingong miyaga-yaga sa biktima human kini magpa-blotter. Matud  pa  sa biktima  nga  dili niya  lung-an hangtud  nga  mapriso  ang  mga  bugal-bugalong  polis  kinsa  gisayon-sayon  lang  siya  sa pagpakauwaw.

Gibutyag usab ni Pedrosa nga “unprofessional” ang gibuhat sa mga polis ngadto sa biktima tungod kay angay unta kini nila nga tabangan gikan sa usa ka traumatic experience.

Nanawagan usab  si Pedrosa nga hinaot unta nga hatagan  og pagtagad sa mga  Local Government Units ug lakip na sa mayor sa Sugbo ang nahitabo sa biktima. (BANAT NEWS)