Kampanya sa BFAR ug TF Kalikasan sa Lapulapu positibo ang resulta

CEBU, Philippines - Menus na ang mga na-report nga mga aksidente tungod sa paggamit og dinamita ingon man ang kuskos o cyanide sa mga mananagat diha sa siyudad sa Lapulapu.

Kini maoy pangangkon sa Bureau of Fisheries and Aquatic Resources-7 subay sa ilang gihimong monitoring sulod na sa pipila ka bulan.

Matud pa ni Adelino Padilla Sr. , City Environment and Natural Resources Office  Agriculture Technologist misalir na ang ilang halapad nga information campaign sa mga isla sa Lapulapu.

Kini human namatikdang wala nay mga aksidenteng nahitabo tungod sa paggamit sa dinamita o tiklong, ang pagpanghilo gamit ang kuskos o cyanide  sumala pa sa Bureau of Fisheries and Aquatic Resources(BFAR).

Ang siyudad sa Lapulapu milusad og programa inabagan sa BFAR ug Task Force Kalikasan.

Kaniadto, duna gyu’y mamatay kada tuig diha sa siyudad sa Lapulapu tungod kay nabuthan og dinamita ug duna say aksidenteng nakalamoy og cyanide.

Matud pa niya nga makadaot gyud dili lang sa tawong nagdala sa dinamita maoy maapektuhan sa dinamita kay hasta ang ilawom sa mga gasang sa ilawom sa dagat mangaguba tungod sa dinamita.

Kung kini mahitabo mas dakong problema sa panginabuhian ang masinati sa mga mananagat nga nagsalig sa mga makuha gikan sa dagat tungod kay wala na say kapuy-ang mga gasang ang mga isda ug mangamatay usab ang mga semilya ug gagmay pang mga kinabuhi sa ilawom sa dagat. (BANAT NEWS)