Bug-at nga krimin ang pagbaligya’g double dead

CEBU, Philippines - Usa  na ka bug-at nga  krimin  karon  ang pagpamaligya  og  karne  nga  double dead nga gikalipay usab  kaayo  ni  Dr. Alice Utlang  ang  hepe  sa buhatan  sa Veterinarya  ning  dakbayan  sa Sugbo. Si  Utlang  kinsa  maoy  kusog  kaayong mikampanya  batok  sa  mga  negosyante  og karne  kinsa  mopalusot  og  mga  karne  nga  double  dead  kon  patay   na  nga daan  gumikan  sa sakit  apan  giihaw  pa  aron  ibaligya  ug  ipakaon  sa  publiko, nahinangop  karong nasuta niya  nga kaabag  niya  ang  nasudnong  kagamhanan  sa maong  kampanya.

Sumala  sa bag-ong  balaod  kadtong  mga  tawo  nga masakpang  mamaligya  og  double  dead  nga karne  pahamtangan  og  silot  nga  pagkabilanggo gikan  sa  unom  hangtud  sa 12 ka tuig  ug  multa  nga gikan  sa P100 mil  ngadto  sa P1 milyon.

Ang maong  balaod  gipirmahan  ni Presidente  Aquino  niadtong  Mayo 15, 2013    ubos    sa Republic Act 10536  nga gihulip sa Meat Inspection Code sa 2004.

Ang  bugtong  tinguha  ning  maong balaod  mao  nga  mahilayo  ang tawo ug kahayopan  gikan sa  mga  sakit  nga  mananakod  una  ihawon  ang  mga binuhing  hayop  sama  sa baboy, baka  ug  manok.

Si  kinsa  mang  madakpan  nga  mamaligya  sa  double  dead  nga karne  magsagubang  sa multa  nga  P200 mil  sa unang  higayon, P300 mil  sa  ikaduha  ug P500 mil  sa ikatulo. Samtang  patak-opan  usab  sulod  sa duha ka tuig  ang   negosyo  sa  malapason. (BANAT NEWS)