CPA giwarningan, ilang koral ipaibot karon

CEBU, Philippines - Pintok  ang pasidaan  sa  Office of the Building Official (OBO)  nga ipalarot  sa Cebu Port Authority (CPA)   ang  ilang  koral   karong  adlawa  ug  kundili  sila (OBO)  ang  molarot  niini.

Ang maong  koral   gitarok sa CPA duol sa Senior Citizens Park ug atbang sa Compania Maritima bldg. apan  wala  lukati  og   fencing  permit.

Kagahapon  gipadad-an sa OBO ang CPA og final demand alang sa pagtangtang sa  maong  koral .

Si Atty. Jose Marie Poblete, City Administrator ug kasamtangang  OIC mayor  sa syudad nagkanayon nga mao  kini mando ni Mayor Michael Rama sa  wala pa kini  molarga  paingon  sa Manila.

Gusto  ni Rama  nga  mawagtang ang maong  koral  sa dili  pa siya  mobalik  nganhi  sa Biyernes.

Sayo  niini  daan  na  nga  mipadayag  ang  mayor  sa iyang  pagsupak  sa  maong  koral  tungod  kay  ang  maong  lugar  nga  gikoral  sa CPA  kasamtangang  parking  area   sa  mga kliyente sa Cebu City Hall.

Giluwatan  na usab sa OBO  og  cease and desist  order  ang  maong koral  sa wala  pa  kini  matukod  apan  wala  panumbalinga  ug  wala tahora  sa CPA  ang  maong  mando.

Tungod  niini gibati  ang mayor  og  kapungot   sa kagahi  og  balatian  sa  mga  nagpasiugda  pagtukod  sa maong  koral  luyo  sa pasidaan nga  giluwat  kanila. 

Gani matud ni Kenneth Carmilita Enriquez, acting chief sa OBO, nga ilegal ang  gihimo sa CPA kay  mipatarok  kini  sa koral  nga  way  permiso ug  nakalapas  kini  sa Presidential Decree 1096 o ang National Building Code.

Apan  gisupak kini  sa    CPA    kay  alang kang Atty. Yusop Uckung, abogado   sa maong  ahensya   nga  ilang  luna  ang  ilang  gikoral  busa wala  na  sila  magkinahanglan  og  fencing  permit  gikan  sa OBO. 

Apan  miingon  si   Enriquez nga kun ang Philippine Ports  Authority (PPA) naglukat og permit alang sa ilang mga imprastraktura, nganong  ang  CPA dili man  aron  ipakita  nilang  may  respeto  sila  sa mayor  nga nagdumala  ning  siyudad  ug  sa OBO.

Nanghinaut si Poblete nga matangtang na sa CPA ang maong  koral karong adlawa   ug  kundili mapugos na ang city administration sa pag-ibot niini. (BANAT NEWS)