11-anyos naghikog

CEBU, Philippines - Patay nang nakit-an sa iyang manghod ang usa ka onse anyos nga dalagita kinsa gituohang naghikog sud sa ilang balay pipila ka minutos human kini giingong gikasab-an sa inahan atubangan sa mga silingan diha sa Don Andres Soriano Village sa Lutopan, Toledo City.

Ang bata nga tinun-an sa grade-6  giingong gikasab-an sa inahan tungod kay nagbantay kini og anak sa ilang silingan.

Matud ni SPO4 Carmelito Hornales, desk officer sa Toledo City Police sa pakighinabi sa Banat News gikasab-an ang bata diha mismo sa balay sa silingan hinungdan sa kauwaw sa bata.

Dugang pa ni Hornales nga pag-abot sa ilang balay gisilotan usab ang bata pinaagi sa pagpalimpyo sa ilang balay ug pagkahuman gidid-an kini nga makagawas sa panimalay.

Gituohang ang bata buot nga moapil sa Flores de Mayo diha sa ilang kapilya diin ang iyang mga manghod miapil og praktis alang sa maong relihiyosong kalihokan, apan gumikan kay ‘grounded’ kini wala na makaapil ang bata.

Ang maong dalagita kinamagulangan sa upat sa magsuon nga ang kinamanghuran usa pa ka tuig.

Nianang pagkaudto miuli ang 10-anyos nga manghod niini ug kini maoy nakakita nga nagbitay na sa pisi ang maguwang.

Ang biktima nga naguol kay dunay nakakita sa pagkasaba sa iyang inahan ug tungod kay nag-inusara ra kini sa balay nianang tungora nakahigayon kini sa paghikog gamit ang pisi nga gihigot sa iyang liog ug gibaat ang pikas tumoy sa kahoy sa kisame dayon nagpakamatay.

Gisuwayan pa unta pagdala ang bata sa Carmen Copper Medical Center apan gideklarar siya nga patay na. Gisusi karon sa kapolisan kung duna bay tulubagon ang inahan tungod sa pagtratar niini sa iyang anak.

Imbestigaron sa kapulisan kung nadapatan ba sa inahan ang bata sa wala pa kini maghikog tungod kay posible kini nga mapasakaan og kalapasan sa RA 7610 o Protection Against Child Abuse, Exploitation and Discrimination.

“Kung nadapatan dunay liability pero kung gisultihan lang wala gyu’y sala ang inahan,” matud pa ni SPO1 Peter Cuanso Jr. ang imbestigador sa maong kaso. 

Ang City Social Welfare and Development sa Toledo mopailawom usab sa 10-anyos nga manghod sa stress debriefing aron makalimtan ang pait nga talan-awon sa gidangatan sa iyang maguwang. (BANAT NEWS)