Dapit diin gipatay si Luage gisusi pa hangtud karon

CEBU, Philippines - Padayon pa gihapon sa ilang imbestigasyon ang kapolisan luyo sa pagpatay kang Rohama Luage kung diin gyud kini gipatay nga gidudahang ang mihimo mao ang iyang karelasyong si Mabini barangay captain Rey Oybenes kinsa giingong nagpakamatay usab sa samang adlaw dihang napalgan si Luage.

Si Cebu City Police Office acting director Mariano Natu-el miingon nga dili pa gihapon nila ma-conclude gyud nga si Oybenes maoy mipatay kang Luage ug ang  kapitan naghikog ba gyud diha sa sitio Tigbao, Barangay Talamban niadtong Huwebes.

“Nangita ‘ta ron og asa dapit napusilan si Rohama, ug asa g’yud ang krimen nahitabo. That’s crucial to the investigation,” matud pang Natu-el.

Si SPO1 Victor Ruel Ayuman, Homicide Section team leader miingon nga ilaha pang gipaabot ang resulta sa paraffin test, cross-matching examination ug autopsy examination nga ipagawas karong adlawa.

“Masulbad ra g’yud nang mga misteryoha kung makuha na nato ang result aning tulo,” sumala pang Ayuman.

Ang paraffin test, sumala pa ni Ayuman maoy mopamatuod kung si Oybenes mipabuto o wala sa armas nga na-recover diha sa sud sa Toyota Hilux diin napalgan ang lawas niini.

Samtang mahibaw-an pinaagi sa cross-matching kung ang bala nga na-recover diha sa Toyota Hilux motakdo sa bala nga nakuha gikan sa lawas ni Luage, samtang ang autopsy, ug  powder burns, makatabang aron matino kung naghikog ba gyud si Oybenes.

Si Ayuman mibutyag nga bag-ohay lang nilang nahibaw-an nga dunay giabangang apartment si Oybenes sa sitio Tigbao.  Ilaha pang susihon ang maong apartment aron pagtan-aw kung duna pa sila’y makuhang ebidensya nga makatabang sa kaso, apan giingong di mosugot ang biyuda ni Oybenes nga si Jecebel kay mangunsulta pa sila og abogado.

“Ningsugot na man unta ‘to, then nausab na sad iyang hunahuna. Basin di na lang mi mamugos ana,” sumala pa ni Ayuman. Matud pa nga si Jecebel mitug-an kanila nga walay mga ebidensya o uban pang mga butang nga makatabang sa maong kaso gikan sa maong apartment.

Apan si Natu-el miingon nga palawman pa nila ang imbestigasyon sa maong kaso lakip na ang giingong kalangay sa mga polis pag-abli sa sakyanan ni Oybenes aron unta madala sa tambalanan si Oybenes.

Ang maong pagkwestyon matud pa naggikan mismo kang Mayor Michael Rama kinsa nahibulong base sa mga report nga milanat pa og pipila ka oras una naablihan ang maong sakyanan nga unta duna may nagkadugo nga tawo sa sulod niini.

Giingong dunay pagtuo ang mga kabanay sa kapitan nga posibleng matabang pa kini kun nadala kini dayon sa tambalanan.

“One PM nahitabo and the police arrived at 5 PM so they assumed na patay na g’yud. Second, naglikay sad sila nga mag-tamper sa evidence. Ang SOCO na ma’y moingon nga ablihan,” matud pang Natu-el. (/EIM)  (BANAT NEWS)