Nahagbong sa septic tank nalumos patay

CEBU, Philippines -  Usa ka 4-anyos nga batang lalaki ang namatay human kini mahagbong sa septic tank sa kasilyas sa ilang silingan diha sa barangay Asuzena sa lungsod sa Barili niadtong Domingo.

Ang  namatay mao si Jay Hommre Villafuerte, nagpuyo sa maong lugar kinsa sayo nianang adlawa wala na igkita sa mga ginikanan.

Matud ni PO2 Jessie Lloyd Sebial sa Barili Police Station dihang nahinabi sa Banat News uwahing nabantayan sa ginikanan ang bata nga migawas pasado alas-onse sa buntag ug sukad niadtong wala na kini mobalik pa.

Ang mga ginikanan midangop sa kapolisan aron ipa-blotter nga kini na-missing ug nagpatabang sila aron pangitaon ang bata.

Atol sa pinangitaay diha sa ilang dapit, nabantayan ang septic tank sa silingan nga nabuslot o abli na kini hinungdan nga gisusi nila ang sud niini.

Diha na nila  nakit-an ang bata nga wala nay kinabuhi. (/EIM) (BANAT NEWS)