12 ka mananagat gikan sa Negros gidakop

CEBU, Philippines - Dose ka mga mananagat gikan sa Negros ang gisikop sa kapulisan sa Tuburan human masakpi nga migamit sa illegal nga pagpangisda sa dagat sa Tuburan alas-2 sa kaadlawon sa miaging adlaw.

Ang mga gidakop mao sila si Melvin Aligato, 29, Jessie Araes, 36, Randy Aligato, 38, Dave Yobal, 34, Ranil Mondigo, 31, Carmelito Aligato, 22, Edwin Aligato, 37, Marlon Aligato, 30, Jesus Aligato, 48, Roberto Araes, 22, Henry Lobaton, 30, ug Deso Ejorango, 54, pulos mga residente sa dakbayan sa Escalante, Negros Occidental. Nasayran nga alas-2 sa kaadlawon dihang mipahigayon ang kapulisan sa Tuburan og Seaborne Patrol nga gipangulohan ni PO3 Vinchie Ramonito Acaso kauban ang duha ka kawani sa BPAT (Barangay Peacekeeping Action Team) ug Bantay Dagat. Matud pa nga misulod ang maong mga mananagat sa teritoryo sa Tuburan. Subay sa Fisheries Code of the Philippines, dili mahimong managat ang taga ubang lugar sa usa ka municipal waters 10.1 ngadto sa 15 kilometros gikan sa baybayon, gawas lang kung sila narehistro sa maong munisipyo.

Nakuhaan sila og pukot, fishing boat,  ug 30 ka banyera nga mga isdang mokantidad og P30, 000. Si PO2 Roberto Rondina sa Tuburan Police Station dihang nahinabi sa Banat News mibutyag nga gibuhian ra sad ang mga mangingisda  human makabayad sa multa. (BANAT NEWS)