Bata, tiguwang mikirig
CEBU, Philippines - Samtang patay nang nadangat sa tambalanan ang 3- anyos nga batang lalaki human kini nakuryentihan sa washing machine nga gigamit sa iyang ginikanan nga nalipat sa pagbantay kaniya diha sa Sityo Sibagay barangay Cantabaco siyudad sa Toledo niadtong Biyernes sa alas 2:00 sa hapon.
Ang biktima mao si Carl Reyes Camucamu, 3- anyos ang panuigon ug nagpuyo ra sa maong lugar.
Matud ni SPO4 Gil Lastimosa sa Toledo City Police dihang nahinabi sa Banat News nalipat ang mga nagbantay sa bata ug nakagawas kini sa balay ug didto nakit-an ang washing machine nga gigamit sa paglaba nga gibutang sa gawas nga bahin sa pultahan.
Sumala pa nga tungod sa kakuryoso sa bata giduwaan niya kini apan nahikapan sa bata ang kable niini nga naka-plug sa outlet hinungdan nga mitapot kini didto ug mikirig.
Matud pa nga milanat pa og pipila ka mga gutlo una nakit-an ang bata nga nipilit sa wire, nakuha kini human gi-off ang plangka apan pag-abot sa Toledo City District Hospital gideklarar kini ni Dr. Bonito Sanoya nga patay na.
Sa laing insidente sa pagka-kuryente, usa ka 65- anyos nga lola ang nakuryentihan ug namatay human aksidente niining nakuptan ang nagyungyong nga wire tunga-tunga sa kagubot tungod sa nahitabong sunog sa ilang dapit. Ang insidente nahitabo sa bukirang bahin sa Barangay Anapog, San Remigio mga alas 11:00 sa gabii sa miaging adlaw.
Si Elisa Sinahonon giingong nakakupot sa usa ka live wire nga nayungyong tungod kay naapil og kasunog ang poste nga gikutayan niini. Nakaangkon og third degree nga paso ang biktima nga maoy hinungdan sa kamatayon niini.
Ang mga residente sa maong barangay nagtinabangay sa pagpalong sa kalayo nga nagsugod sa panimalay sa magtiayong Romeo ug Haide Sinahonon sa wala pa makaabot ang San Remigio Fire Station.
Si SFO1 Edgardo Quiamco, desk-in-charge, mibutyag nga electrical misuse ang hinugdan sa sunog.
Subay sa imbestigasyon sa kabomberohan nga si Haide mibiya sa iyang heater nga nag-charged sa ilang balay samtang nagtan-aw og salida sa ilang silingan dihang kalit nga adunay mibuto ug sa paglingi ni Haide nagkalayo na ang iyang panimalay.
Daling mikatap ang sunog sa duha ka laing panimalay nga gipanag-iya nila ni Rolando Edaño ug Marlo Sinahonon. Ang maong mga balay ginama sa light materials.Ang danyos sa sunog mukabat sa P150,000.
Aron sa pagpugong sa kalayo sa pagkatap sa laing panimalay, nagtinabangay ang mga managsilingan ug paryente sa pagpawong niini apan nakuryentihan na hinuon si Elisa.
“Kanang nahugno nga linya unya iyahang giwahing,†matud ni Quiamco. (Ria Mae Booc, Darrel Carumba ug Ray Anthony Espedido, CNU Intern/EIM)
- Latest
