Kaatbang sa partido naigo sa bala

CEBU, Philippines - Gumikan  sa managlahing  partido  nga  gilabanan   sa milabay’ng  piniliay, nanghagis  ang  usa  ka kawani  sa lungsod hangtud  nga  naigo  sa iyang bala  angol  ang  iyang  kabingkil  nga  silingan  sa sitio Bangkobangko,  barangay  Sandayong,  lungsod  sa Tuburan  sa miaging  gabii.

Ang  biktima  mao si Elsie Malabago, 35, minyo ug nagpuyo sa maong lugar, samtang ang suspek mao si Antonio Malinao, hingkod, nga silingan  sa biktima  ug  job order nga  kawani  sa maong lungsod.

Si PO1 Joseph Beher sa Tuburan Police Station mibutyag  sa Banat News nga ang suspek  nalasbag  na  pag-ayo  kay  nag-inom na  kining daan sukad  pa nianang  udto  ug  miadto sa pinuy-anan sa biktima   ug  pag-abot  didto  giingong  nanghagis  kini  ug  nagpasalba sa  iyang  armas.

Gumikan  sa iyang  gihimo  naigo  sa walang  paa  ang  biktima .

Dihadiha  gihatud  dayon  ang  biktima   ngadto  sa Tuburan Emergency  Hospital  samtang  nadakpan usab  dayon  ang  suspetsado   pinaagi  sa  miresponde  nga  mga  polis.

Dugang nahipos nga kasayoran  sa  kapolisan  nga  manag-kontra partido  sa milabay  nga election   ang biktima ug ang suspek tungod kay managlahi   sila  og  gisuportahang  kandidato hinungdan  sa ilang  panagbingkil. Ihandos  na ngadto  sa korte  ang  tukmang  kiha  batok sa suspetsado  ugma. (/WC) (BANAT BALITA)