Garcia makalingkod og balik pagka-gobernador
CEBU, Philippines - Hingpit na nga makabalik sa buhatan sa Kapitolyo si suspended Governor Gwen Garcia ini’g petsa 19 sa buwan sa Hunyo tungod kay mapupos na ang unom ka buwang suspensyon nga silot kaniya sa kasong grave abuse of authority nga gipahamtang sugod niadtong miaging buwan sa Disyembre 19 sa miaging tuig.
Si Garcia gikataho nga molingkod pagbalik pagka-gobernador sud sa onse ka adlaw.
Matud ni Vice-Governor-elect Agnes Magpale nga andam siya sa pagbalik sa kanhi gobernadora ug gani andam na usab siya sa pagahimuon nga turnover sa buhatan niini.
Gusto ni Magpale nga maablihan na unta ang opisina sa gobernadora aron maandam na unta kini alang sa bag-ong Governor-elect nga si Atty. Hilario “Junjun†Davide kinsa molingkod na unya sa katungdanan inig ka Hulyo 1.
Gikalipay usab nga gipahibawo ni Magpale nga aduna nay kapin P300 milyones nga pundo ang panudlanan sa Kapitolyo human lang kini mabinli kaniadto sa nibiyang gobernadora og P90 Milyon.
Matud ni Magpale nga gikan kini sa Internal Revenue Allotment nga P 150 milyones nga kita sa Kapitolyo matag bulan.
Gisaysay ni Magpale nga nakabayad na usab ang Kapitolyo sa mga utang niini sa una ug ang wala na lang mabayri mao ang mga utang nga walay mga supporting documents sama sa catering nga giingong gi-order lang pinaagi sa telepono.
Sa pagkakaron gikatakdang mobayad na ang Kapitolyo sa bayranan nga P57 milyones nga bayranan sa tubig nga mao ang bulk water project nga angayan gibayran na unta niadtong milabay nga bulan sa Agosto sa miaging tuig. (Kristianne Marie Alcaria, CNU Intern/EIM) (BANAT BALITA)
- Latest
