Clearing operations sa Ermita gipahunong ni VM Young

CEBU, Philippines - Gimandoan ni Cebu City acting mayor Joy Young si City Administrator Atty. Jose Marie Poblete sa pagpahunong sa clearing operations sa Sitio Bato, Barangay Ermita human sa panawagan sa mga residente sa maong lugar alang sa usa ka “tinud-anay” nga konsultasyon.

Si Young nagkanayon nga atol sa iyang pagbisita sa maong dapit, kadaghanan sa mga residente nagbagulbol kay dili tinarong ang nauna nga konsultasyon nga gipahigayon sa barangay hall sa Ermita tungod kay gamay kaayo ang lugar ug dili maigo ang tanan nga residente.

Mipasangil usab sila nga giprayoridad sa maong konsultasyon kadto rang mga supporters sa Team Rama ug wala pasudla katong mga dumadapig sa Bando Osmeña Pundok Kauswagan (BOPK).

Tuyo sa acting mayor nga mopatawag og laing konsultasyon sa mga homeowners aron sutaon kung unsa gyuy ilang ganahan nga mahitabo.

Mangita pa hinoon sila og usa ka lugar nga dako kung asa walay makahimo sa pagsamok kanila ug gitakda kini karung Lunes.

Gibutyag ni Young nga gikinahanglan gyud ang reblocking apan kinahanglan nga madungog usab ang tingog sa katawhan.

Si Atty. Poblete sa iyang bahin nagkanayon nga wala sila mapakyas sa pagpatawag og konsultasyon.

 Anaa usab silay mga dokumento nga magpamatuod nga nakapahigayon sila og nagsunod nga konsultasyon niadtong Abril 20, 22, ug 26 sa mga residente nga apektado sa sunog sa Ermita.

Dugang pa niya nga sukwahi kini sa giingon sa balaud nga gikinahanglan ang usa ka clearing operations human dayon sa usa ka kalamidad.

Bisan pa man niini, sundon gihapon nila ang mando ni Young isip maoy temporary nga mihulip kang Mayor Michael Rama isip ilahang chief executive. (BANAT NEWS)