DENR mihagit sa mga mananaog nga kandidato

CEBU, Philippines - Gihagit  sa  mga  opisyal  sa kalikopan  ang  midaog  nga  mga kandidato  sa lokal  nga  kagamhanan  sa miaging piniliay  nga  hatagan  nila  og  prayoridad  ang  pagpatuman sa  balaod  bahin  sa  hustong  paglabay  sa basura.

Si Ed Llamedo  tigpamaba  sa Departmenrt of Environment and  Natural  Resources (DENR) 7  kagahapon nagkanayon  nga  angay  hatagan  og pagtagad  sa bag-ong  molingkod  nga  mga  opisyal  sa lokal  nga  kagamhanan karong  Hulyo 1, 2013  ang bahin sa sanitary landfill  ug  ang  pagtukod  og  material recovery facility (MRF)  sa matag  lugar.

Atol  sa tulumanon AGIO Forum  nga  gipalanog  sa DYMR, si Llamedo  mohatag  og  gibug-aton  bahin sa kamahinungdanon  sa  pagtukod  og  sanitary landfill   sa matag  lungsod  nga maoy  labing  gikinahanglan  aron  may  kalabayan  sa    mga  basura  nga nabahig  na   sa  MRF  sa matag  barangay.

Ang  MRF  maoy  lugar  diin  bahigon  ang  basura  nga malata  ug  di malata  maingon  man  kadtong  magamit  pa  pag-usab  o  recyclable.

Gipasabot  ni  Llamedo  nga  gumikan sa  climate  change, dako kaayo  og  kausaban  ang  panahon  diin  ang  kahugaw  sa palibot  maoy  sinugdanan   sa mga  baha  ug  lunop  ug  mga  nagkalainlaing  sakit  nga  mohugpa  sa  palibot  matag  karon ug unya.

Matud  pa  ni  Llamedo  nga makapasubo  kaayo  kay  sukad  ipatuman  ang  balaod  bahin  sa hustong  paghipos  sa basura,  wala  pay  10 porsento  sa mga kalungsoran  ug  siyudad  sa tibuok  nasud  ang   nakapatuman  og  sanitary  landfill.

Kini  tungod  kay  wala  kini  kahatagi  og  hustong  pagtagad  sa  mga  nagdumala  nga  opisyal  sa mga  siyudad  ug  kalungsoran  sa nasud, sumala sa tigpamaba  sa DENR.

Maoy  hinungdan  nga karong  bag-o  lang  nahuman  ang election  ug  may  mga  bag-o  na  nga opisyal  nga  molingkod  sa mga siyudad  ug  lungsod,  gusto  sa taga  DENR  nga  makabaton  unta  og hunahuna  kining  mga tawhana  sa  paghatag  og  unang  pagtagad  bahin  sa tukmang  paghipos  sa basura  sa ilang tagsa-tagsa  ka  dapit.

Miingon  si Llamedo  nga ang  paghimo  sa ingon  makasimhot  og  limpyo  nga  hangin  sa kalikopan  ang katawhan  nga makasalbar  kanila  gikan  sa mga balatian.

Labaw  sa tanan  makalikay  ang nasud  sa grabeng  epekto  sa climate  change  nga nasinatian  karon sa tibuok  kalibotan. (BANAT NEWS)