Yellow submarine dako’g alakanse

CEBU, Philippines - Minilyon  ka  pesos  na ang alkanse  sa  operator  sa Cebu Yellow Submarine (CYS) sukad  suspensoha  ang  operayon  niini  niadtong  Abril.

Kini  ang gibutyag  ni  Kim Jun,  ang  general manager sa CYS  kinsa  nagkanayon  nga  sa tag P252 mil  ang  inadlaw  nilang  kita,  anhi  ibase  ang  ilang  katibuk-ang alakanse  gikan  niadtong   Abril 25, 2013  hangtud  karon, ug hangtud  malibkas  ang  pagkasuspenso  sa  ilang  operasyon.

Napugos sa  paghunong  ang  biyahe  sa CYS  ilawom  sa kadagatan  sa dakbayan sa Lapulapu  dihang  nasayran  nga  gidaro niini  ang  mga  kagasangan  sa ilawom  sa Kontiki wall  sa  barangay  Maribago sa maong  dakbayan,  ug  dako  kaayo  ang  nahiagomang  kadaot   sa mga  rekurso  sa kinaiyahan sa maong  lugar.    Samtang si   manlalaban Yuri Binluan ang Lapulapu City Attorney mibutyag  nga wala pa sila makadawat sa resulta sa gipahigayong inspection sa mga sakop sa DENR Marine Biologist nga mihimo sa ilang kaugalingong imbestigasyon sa ilawom sa Kontiki wall  sa milabay’ng semana.

Matud pa ni Atty. Binluan   nga ila unang sutaon ang rekomendasyon sa DENR kung unsay tulobagon sa CYS sa kadaut nga nahimo niini  sa dili pa nila libkason ang kamanduan nga nagsuspenso sa ilang operasyon.

 Si Lapulapu City Mayor Paz Radaza una nang mipadayag nga wala siyay plano nga undangon ang operasyon sa maong submarino kundi paghatag lamang ug pasidaan niini  aron  maampingan   ang  mga butang  nga  iya  sa   kinaiyahan ilawom sa kadagatan.

Samtang  si Ed Llamedo, tigpamaba  sa  DENR  mibutyag  sa Banat News  nga  mahuman  na  ang  imbistigasyon  niini  karong  sunod  semana  ug  masayran  na  kun  pilay  bayranan  sa tagdumala  sa CYS  ngadto  sa kagamhanan sa dakbayan sa Lapulapu.

Ang resulta sa  maong imbestigasyon  isumiter sa DENR ngadto sa  kagamhanan sa  maong dakbayan  aron masayran  sa CYS  kun  pilay  ilang  obligasyon. (BANAT NEWS)