Tinda sa Muslim gihurot og kawat

CEBU, Philippines - Gihimulbolan sa mga tinda ang usa  ka tindahan  sa Muslim  sa  Cansaga, Consolacion  sa  mga  wala  hiilhing  kawatan  nga  milungkab  niini  ug kagahapon sa alas 7:00 sa buntag  nila  madiskobrehi.

Ang  mga  baligya  nga  gihurot og hakot  sa  mga kiriwan   naglakip  sa  mga senina, relo  de pulso, sapatos, eyeglasses ug uban pa.

Ang   biktima  mao si Hadji Said Maacaurao Sultan, 47, minyo,  nga  taga Marawi sa Mindanao.

Lakip  sa   mga nahanaw  mao ang pito ka mga kawo, 3 ka sapatos, 7 ka sleeveless nike, 104 ka relo  de pulso,13 ka eyeglasses ug laing 20 ka mga baligyang t-shirt nga tag P300  matag usa.

Gibanabana nga mokantidad  sa P37 mil  ang  tanang mga baligya  nga  nangawagtang.

Si PO2 Jovannie Mabano sa Consolacion Police Station   nagkanayon nga nakurat  na lang  ang biktima  dihang  pag-abli  niya  sa iyang  tindahan   wala  nay  kandado  ang    main door   niini.

Sa  iyang  pagsusi sa  sulod   nahawan  na  ang  iyang  mga  baligya   busa  wala  siyay  nahimo  gawas  sa pagpadangat  niini  ngadto  sa kapolisan.

Sa   pag-imbistigar  sa kapolisan  nasuta  nga   gipugos   og guba ang kandado ug sira sa main door ug didto moagi   ang  mga  kawatan  paingon  sa  sulod sa tindahan   dayon gihakot  ang  tanang  mga baligya didto.

Nagtuo  ang  kapolisan  nga  kaadlawon  na  kini lungkaba  sa  wala matino  nga  gidaghanon  sa mga  nangawat. (BANAT NEWS)