Brigada Eskuwela sa Mandaue gilusad

CEBU, Philippines - Gilusad  sa  mga  opisyal  sa Department  of Education (DepEd)  sa dakbayan  sa Mandaue  ang  Brigada Eskwela   sa 49  ka  mga  tulunghaang  publiko  kagahapon.

Kauban  sa taga  DepEd mao  ang  mga  opisyal  sa barangay,  mga  ginikanan  ug  mga  tinun-an  sa pag-ayo  sa  mga  guba  ug  pagpanglimpyo  sa sulod  ug  palibot  sa matag  tulunghaan.

Gawas  sa mga  opisyal  sa barangay  miabag  usab ang  mga  kapolisan, negosyante, mga taga simbahan  ug  uban  pa.  Usa  sa  mga  eskuylahan  nga  gubaon  kaayo  og  atop  ug  mga  lingkoranan  mao  ang  Subangdaku Elementary School sa barangay Subangdaku  sa maong  dakbayan.

Si Association of Barangay Council (ABC) federation president nga si barangay Kapitan Ernie Manatad sa barangay  Subangdaku maoy nangulo sa mga opisyal sa maong barangay sa  pagpanghinlo  sa  mga  kanal.

Gibahin-bahin  nila  ang  mga  trabahuon  sa  matag  eskuylahan kay  gawas  sa pagpangayo  sa  mga  nangadaot   may  mga  namintal  usab  sa  mga  bongbong  o  hain mang  bahin sa eskuylahan  nga  nagkinahanglang  patahomon.

May  mga  mipahimutang  usab  sa  mga  tanom  sa palibot  sa  eskuylanan ug  uban  pang  mga  kasangkapan  nga gitumong  aron hapsay  ang  pagtungha  sa  mga  bata  sa unang  adlaw  sa  klase karong  Hunyo.

Gani  nakadayeg  kaayo  si Dr. Virginia Zapanta, ang  city school division superintendent sa maong dakbayan gumikan  sa suporta  nga gitunol  sa  tanang  misalmot  sa Brigada Eskwela.

Ang kura  paruko   sa barangay Subangdaku nga si Padre Rolyn Vics mao usab ang nangulo sa grupo sa relihiyusong  pundok sa  pagpanglimpiyo ug  uban  pang  gimbuhaton  atol  sa maong  kalihokan. (BANAT NEWS)