Joavan higpit gibantayan

CEBU, Philippines - Gwardiyado sa kapolisan ang public enemy number 1 nga si Joavan Fernandez dihang gidala kini sa buhatan sa Police Regional Office-7 gikan sa lungsod sa Moalboal kagahapon.

Lakip nga gipresentar mao ang duha niya ka kauban nga nasikop nga silang Carlito Cañada nga giingong Job Order employee sa Talisay City Government ug Benito Sellon nga giingong bata-bata ni Joavan  ug mitabang kaniya sa pag-ikyas patubang sa Negros.

Matud pa ni Deputy for Adminstration, Chief Supt. Samuel Yordan kinahanglang hugot ang seguridad sa butangan kang Joavan.

Samtang ang hepe sa kapolisan sa lalawigan sa Sugbo, Sr. Supt. Patrocinio Comendador miingon nga ilang hangyoon ang korte sa Barili aron tugotan silang ibutang sa Cebu Provincial Rehabilitation Center (CPDRC) si Joavan. Dugang kaso nga paglapas sa Comelec Gun ban, Illegal Possesion of Firearms and Ammunitions. Bag-ohay lang nalutsan og warrant of arrest sa susamang mga kaso si Joavan lakip na ang illegal possession of explosives.

Si Fiscal Jerome Abarca maoy nakadawat sa bag-ong kasong gisang-at batok kang Joavan. Samtang ang mga bata-bata ni Joavan, gipasakaan na usab og kasong obstruction of justice, harboring criminals human nila gisuwayan sa pagtabang unta si Joavan nga maka-ikyas gawas sa Sugbu.

Samtang walay armas nga nakuha ang kapolisan gikan sa duha sukwahi sa unang report nga migawas.

Giingong sa Barili RTC ipahigayon ang hearing apan suwayan sa paghangyo sa kapolisan ang korte nga ibutang lang sa CPDRC si Joavan. (BANAT NEWS)