Interes sa katawhan ug di partido ang angay unahon

CEBU, Philippines - Si Cebu City South district councilor-elect Dave Tumulak malaumon nga dili makabalda sa mga proyekto sa syudad ang pagkabahin sa konseho ug nga mas mabungahon ang konseho nga molingkod sugod sa Hulyo 1.

Bisan pa man naggikan si Dave Tumulak sa minoriya, siya nagtuo nga magkasinabot gihapon ang mga konsehal sa syudad tungod kay pareho ra sila og katuyoan alang sa kalamboan sa syudad  ug kaayohan sa kinabag-an.

Dakong supak si Tumulak nga mamahimong hinungdan ang panagbangi sa mga political party sa pagdawat sa katawhan sa serbisyong ilang gipaabot gikan sa mga gibutang nila sa posisyon pinaagi sa ilang mga botos.

Mipasidaan si Tumulak niadtong mga konsehal nga padayong nag-apas sa ilang mga politikanhong interes ug gipadaplin ang interes sa katawhan.

Matud niya anha lang unya sila makaamgo sa sunod nga piniliay tungod sila hukman unya sa mga botante sama sa gidangatan sa mga nangapildi sa nakalabay’ng piniliay.

Gihangyo usab ni Tumulak nga bisag dili mobali ang uban nga mga konsehal sa pikas partido ipatigbabaw unta nila sa tanan ang kaayohan sa katawhan.

Mipasalig usab siya nga dili lisud para  kaniya nga ikatrabaho ang mga konsehal tungod kay sayon ra siyang duolon ug maki-amigo ug mahimo gani nila siyang sugoon. (BANAT NEWS)