Pangandam sa kalamidad tutukan ni Tumulak

CEBU, Philippines - Si South District Councilor-elect Dave Tumulak moporma og City Emergency Response Team susama sa iyang naporma nga Basak Pardo Emergency Response (BPER).

Si Tumulak nagkanayon nga nakita niya ang kakuwang sa Disaster Risk Reduction and Management Council (DRRMC) bisan pa man sa kadako sa budget alang niini nga moabot og P170 milyones sa matag tuig.

Sumala pa niya, gumikan kini sa naghinobrang pamolitika sa ubang mga konsehal nga mas gusto pang babagan ang proyekto inay kaayohan sa kadaghanan.

Siya mibutyag nga iyang prayoridad gyud unta public safety ug nga ang gusto niyang siya maoy mangulo sa Cebu City DRRMC tungod sa kataas na sa iyang kasinatian bahin niini.

Usa sa iyang mga plano mao ang pagporma og City Emergency Response Team tungod sa iyang nakita nga kaepektibo niini dihang ila kining gi-implimentar sa iyang barangay sa Barangay Basak Pardo.

Dugang pa niya nga magporma siya og mga grupo nga maoy motutok sa north district, south district, kinapusoran sa syudad, ug lahi usab nga grupo sa mga bukirang barangay sa north ug lain usab sa south district ug ang control center niini ipahimutang unya sa Cebu City Hall.

Malaumon si Tumulak nga 100 porsiyentong uyonan sa konseho ang iyang mga pangandoy sa pagpalambo ang maong komitiba kung serbisyo man ugaling ang gihunahuna sa tanan.

Hinuon sama sa gihimo ni Mayor Michael Rama sa mga proyektong gibabagan sa konseho kaniadto, dunay alternatibong plano si Tumulak aron mahinayon ang iyang damgo pinaagi sa private-public partnership diin magpatabang siya sa pribadong sektor aron mapundohan ang maong proyekto. Sumala pa niya ang Republic Act 10121 o ang Disaster Risk Reduction Law kinahanglang hatagan og gibug-aton sa tanang panahon.

Buot niyang mabutangan ang tanang sitio og fire hydrants aron di maglisod ang kabomberohan panahon nga dunay sunog. (BANAT NEWS)