BOPK councilors di mobalhin
CEBU, Philippines - Mga midaog nga konsehal nga sakop sa Bando Osmeña Pundok Kauswagan (BOPK) nga nakadaug sa miaging piniliay walay planong mobali ngadto sa Team Rama.
Atol sa thanksgiving party nga gipahigayon sa BOPK sa South Road Properties niadtong Domingo sa hapon, misaad sila nga dili sila mobiya sa BOPK.
Kasagaran nila namasangil nga maong napildi ang ilang kandidato sa pagkamayor nga si Tomas Osmeña batok kang Mayor Mike Rama tungod lang sa pagpamalit og botos sa mga katawhan.
Dili sila katuo nga mapildi si Osmeña tungod sa gidugayon na niini sa politikanhong gubat, mipasangil hinuon silang namalit og botos ang kaatbang maong mopasaka sila og portesta.
Si Konsehal Alvin Arcilla nagkanayon nga walay klaro ang plataporma sa panggobyerno ni Rama.
Samtang si Konsehal Lea Japson miingon nga tinud-anay nga serbisyo ug dili pamalit arun makadaug ang ilang gihimo.
Mapasalamaton lang gihapon ang pilderong si Vice Mayor Joy Young sa tanang nisuporta kaniya ug giklaro usab niya nga dili tinuod ang mga mitumaw nga estorya nga mobiya ang mga BOPK councilors.
Si Tomas Osmeña, sa iyang bahin miingon nga susama siya sa maayong kapitan sa usa ka padung kalunod nga barko. Magpabilin siya sa barko hangtud sa kataposan. (BANAT NEWS)
- Latest
