Duha gipareglaha’g kulata, dunggab ug pusil

CEBU, Philippines - Naangol ang duha  ka ulitawo human  kini  kulataha  dayon gidunggab  ug  gipusil  sa unom  ka  menor  de  edad nga  namarigla  kanila     didto  sa PUJ terminal sa dalan Punta Rizal, barangay Pajo, dakbayan sa Lapulapu  sa miaging gabii.

Ang mga  biktima mao si John Cueco, 24, ug Joy Noel Bustillo, 20, pulos ulitawo ug mga molupyo sa Seaside Pajo, sa  maong dakbayan.

Si PO1 Jude Querobin sa homicide section sa kapolisan sa maong dakbayan nga nahinabi sa Banat News miingon  nga  usa  sa  unom  ka  bayong-bayong   nga namaregla  sa  mga  biktima   ilang  nadakpan.

Sumala  niya  nga  ang  mga  biktima nag-inom   sulod  sa usa ka imnanan  ug  miukopar    sa  usa  ka  lamesa, sa   nahisgutang PUJ terminal    sa  maong dakbayan,  samtang  ang  ang  mga  kriminal  didto   na  nga  daan   sa pikas  lamesa  sa  pagsulod  sa  mga  biktima.

Matud pa ni PO1 Querobin nga dihang namauli na ang duha ka   biktima ,  gisundan  sila  sa ilang paggawas  ug gipangulata  sila sa  walay  igong  hinungdan.

Si PO1  Querobin miingon nga wala pa matagbaw  og kulata,  usa  sa  maong grupo  miluthang  kang  Cueco sa paa ug ang laing  biktima  gidunggab usab sa dughan sa laing  kauban  sa  grupo.

Human sa maong pagpanunggab ug pagpamusil, dali   kaayo  nga nakalayas  sa maong  lugar  ang  mga  kriminal.

Samtang  gidala  sa  tambalanan  ang  mga  biktima, miabot  usab  ang  kapolisan  kinsa  diha-diha  milusad  og  hot  pursuit  operation  batok  sa  mga  kriminal.

Hinuon  usa    sa  unom kansang  ngalan  wala      ibutyag  tungod  menor  de edad,  gihatud  dayon  sa  kapolisan  ngadto  sa buhatan  sa City Social Welfare Office sa maong dakbayan .

Nasuta  sa kapolisan  nga  usa  ka  paregla  ang  gibuhat  sa maong  mga  batan-on  ngadto  sa ilang  gikulata, gidunggab  ug  gipusil.  (BANAT NEWS)