No.3 nga drug pusher tiklo

CEBU, Philippines - Nagtingkagol sa karsel ang ikatulo sa listahan sa mga bigtime drug  pusher  sa lalawigan sa Sugbo human kini masikop atol sa gipahigayong buy  bust  operation sa mga sakop sa Provincial Intelligence Branch (PIB)  didto  sa barangay  Ilihan, syudad  sa Toledo  sa miaging  gabii.

Ang  suspetsado giila  nga si Felizardo Tito, 42, molupyo sa barangay Ilihan, sa maong  dakbayan   kinsa  anaa  sa top 3  sa  listahan  sa  mga  bigtime drug pusher sa  kapolisan.

Ang team leader sa maong operation   nga si SPO1 Reynaldo Solante, mibutyag  nga ilang gipalitan si Tito og usa ka medium pack  nga  shabu nga nagkantidad og P15 mil.

Dihang gitunol kini  niya ngadto  sa  posuer buyer nga police  dihadiha  gikuptan dayon  kini  sa maong  polis apan  abtik  kaayo  kining  nakabuhi  ug  miambak    ngadto  sa silong  sa  ilang  balay. Apan tungod  kay  may  nag-atang  nga  mga  polis sa silong  wala na siya  makaikyas. Natusok  sa  barb  wire  ang  iyang  kamot  dihang nakuptan   niya  kini  sa  iyang  pag-ambak  sa silong.

Samtang ang hepe sa PIB nga  si Supt. Rodulfo Albotra miingon nga ika-tulo na madakpi si Tito gumikan  sa pamatigayon  niini og  illegal nga drugas. Dugang pa ni Albotra nga dinagko na  nga  kantidad  sa shabu  ang gibaligya ni Tito sa ilang dapit  karon  kay  mohalin  na man  kini  og tag P100 matag  semana.

Pipila ka lugar nga  ariyahan  ni  Tito  sa iyang  baligyang  shabu mao ang  lungsod sa Pinamungajan ug Balamban.

Matud  pa  ni  Albotra nga gumikan sa kadangog  ni Tito milanat  og tulo  ka  buwan  nilang  paniid  niini.

Nasakmit gikan kang Tito mao ang upat ka dagkong pakete  sa big packs sa  shabu ug duha ka medium pack  niini  nga  ang  tanan   nagkantidad og dul-ang  P200 mil.

Gawas niini, nasakmit  usab  sa kapolisan  ang  duha ka kalibre .22,  usa  ka long rifle ug laing .45 kalibre  nga  pistola.

Sa pagkakaron  nagtingkagol  na  kini  sa prisohan aron  atubangon  ang  kiha nga  ipasaka  batok  kaniya. (BANAT NEWS)