Mga abogado sa mga Reluya andam na sa kaso

CEBU, Philippines - Ang  mga abogado sa kampo sa pamilyang  Reluya andam moluwat og affidavit kung mopasaka  na ang  maong  pamilya og   kaso batok sa  mga  namanhig kanila  didto sa  barangay Balungag   sa miaging election.

Si Atty. James Gonzales mibutyag sa mga tigbalita kagahapon nga didto siya madestino  sa barangay Lantawan usa  sa mga bukirang barangay sa San Fernando, sa maong  higayon.

Matud niya nga giinitan siya sa mga kaalyado sa mga pamilyang  Canoy tungod kay gisumbong niya ngadto sa Board of Election Inspector (BEI) ang  usa  ka  watcher  nga milili sa balota sa usa ka botante pagsuta  kun kinsay gibotaran niini. Gibutyag ni Atty. Gonzales nga pasado alas 4:00 sa hapon niadtong Lunes mitawag siya sa mga Reluya sa  pagpadala  og  sakyanan  nga mokuha kaniya didto  sa maong  lugar  kay  nabalaka  siya  sa iyang  kinabuhi.

Dihang  mitawag kaniya  si Atty. Dodong Baduel  nga didto  usab  sa ubos nga  barangay  iya  kining  gisultihan  nga nahadlok siya  busa  magpakuha  siya  og  sakyanan. Apan  misamot  ang  iyang  kalisang  dihang  nasayran  niya  gikan  kang Baduel  nga gibanhigan didto  sa Balungag  ang  sakyanan  nga  mokuha  kaniya.

Busa  misakay  na lang  siya  habal-habal  paingon  ngadto  sa lungsod  ug  naabot  siya  didto  alas  7:00  na  sa gabii.

Sa laing bahin, ang para-legal nga si Benedicto Cobarde Jr. mibutyag sa mga tigbalita  nga siya maoy nadestino didto sa Balungag uban kang Atty. Mileneo Pascual.

Matud ni Cobarde nga mga pasado alas 4:00 sa hapon ang SUV Safari sa mga Reluya  nga  gibanhigan  nahiabot  sa maong lugar nga  gikargahan  sa pagkaon alang  sa mga supporter sa mga Reluya.

Ang drayber  sa maong sakyanan  mao  si Antonio  Kong, 61,  nga  samaran  sa bukobuko  sa  pagpamanhig, ug  uban kaniya    sila   si Lyca Selma, 15, ug Joy Saducos kinsa  pulos  gibati  og  kalisang  gumikan  sa pamanhig  nga  nahitabo.

Matud ni Cobarde nga nasalbar  si  Kong   sa seat belt kay  mao  kini  nakasabod  sa bala  hinungdan  nga wala  kini  makataop  sa  iyang  lawas.       

Apan  dihang  mipadayon  sa unahan  ang  sakyanan  nga  gimaneho  ni Kong,  girapido  na  usab  kini  sa  mga  bala  hinungdan  nga nag-iyahay  og  panagan  ang  mga  tawo  nga nagpundok  sa presinto  sa kalisang  nga  mangamatay  sila. 

Gibutyag ni Cobarde nga ang nakaluwas kanila mao ang TV-5 nga misaka ngadto sa maong lugar    kay  gipasakay  sila  niini  ug didto na sila moagi sa karsada lahos sa dakbayan sa Carcar  kay  nakadawat sila og report nga may  laing  grupo  nga   mobanhig kanila.

Sa laing bahin, si Senior Inspector Gerard Ace Pelare, hepe sa San Fernando Police Station sa pakighinabi niini sa Banat News kagahapon mibutyag nga padayon pa nilang  giimbistigar  ang  maong  hitabo.

Matud niya  nga wala pa moduol sa iyang buhatan ang mga Reluya aron kini mopasaka og kaso batok sa mga responsabli.

Gibutyag ni Pelare nga ugma gitakda   nga  ila  na  nga  ihandos  ang  ilang  report  ngadto sa provincial headquarter bahin sa tanang nahitabo sa milabay’ng eleksiyon.

Ang Banat News misuway og tawag kagahapon sa kampo sa Reluya kun mopasaka ba sila og kaso batok sa ilang gidudahang responsabli sa hitabo apan wala kini motubag sa tawag.

Sa milabay’ng election si incumbent mayor Antonio “Abe” Canoy ug ang iyang anak nga si incumbent councilor Mikko Canoy maoy  mikandidato  isip mayor ug bise mayor sa ilang  lungsod.

Samtang ang magtiayong Neneth ug Ricardo Reluya mao usab  ang miatbang  kanila isip mayor ug bise mayor. Hinuon  ang amahan ug anak nga Canoy maoy gideklarar  nga  mananaog  sa  maong  piniliay.  (BANAT NEWS)