Nanguha’g kaka giluthang patay

CEBU, Philippines - Gipusil  patay  sa  wala  hiilhing  kriminal  ang  usa  ka  ulitawo nga  nanguha  og  kaka  didto  sa sitio Bout,  barangay  Punta  Engaño, dakbayan  sa  Lapulapu  sa miaging  kaadlawon. Ang  biktima  giila  sa kapolisan  nga  si Rodrigo  Oyao, 20,  ulitawo  nga  may kapuyo,  ug  molupyo  sa maong  lugar.

Matud  pa  ni  SPO1 Allan  Pantaleon  sa  Lapulapu City  Police  Station  nga  naglakaw  sa karsada  ang  biktima  kauban  sa iyang  silingan  nga  si Jelvin Senerpida, 29,  dala  ang  mga  kaka  nga  ilang  nakuha.

Apan  kalit  lang  gihunongan  sila  sa usa  ka  motorsiklo  nga  gisakyan   og  duha  ka wala  hiilhing  lalaki.

Ang  angkas  niini  sa luyo  maoy  mipusil  sa walay  igong  hinungdan sa  biktima.

Nasabak  sa tulo ka  bala sa buko-buko  nahagba sa  karsada  ang  biktima  nga  nabugtoan  sa iyang  kinabuhi  samtang naglunang  sa kaugalingon niining  dugo.

 Diha-diha  mibiya  usab  dayon  ang  mga  kriminal  ug  dali  kaayong  nakapahilayo  sa  maong  lugar.

Ang  kauban sa biktima  mao  nay  mitawag  og  polis kinsa  maoy  misuta  nga  wala  nay  kinabuhi  ang  biktima.

Padayon  pa  karong  gipangita  sa kapolisan  ang  mga  kriminal. (BANAT NEWS)