Babaye gipatay sa driver

CEBU, Philippines -  Namatay ang usa ka babaye human kini pusila sa  wala  hiilhing drayber sa motorsiklo nga iyang gisakyan didto  sa Unit 5, sa barangay Kalunasan, ning dakbayan  sa Sugbo  sa miaging  gabii.

Ang biktima nailhan nga si Jovelyn Pepito, 28, ug molupyo   sa sitio Yello Bill, sa maong barangay. Sa pasiunang imbestigasyon sa kapolisan nasayran nga nagpahatod sa suspetsado  ngadto sa Kalunasan barangay hall   ang  biktima.

Apan  sa duol  na  kini sa nahisgutang lugar giingong kalit lang   gipahunong  sa suspetsado  ang iyang  habal-habal  dayon milanit  sa iyang  armas  de fuego  ug  gipusil  ang biktima  sa walay  igong  hinungdan.

Ang  biktima  nga  nasabak   sa nawong dihadiha  nabugtoan  sa kinabuhi.

Mibiya usab dayon  ang  kriminal  sa maong  lugar  ug  gibilin  ang  biktima  nga nahagba  sa karsada  nga  naglunang  sa iyang  dugo. Gisuwayan  pa  kini sa  paghatud  sa mga sakop sa Emergency Rescue Unit Foundation ngadto  sa tambalanan  apan  patay  na  kini  sa paghiabot  didto  sa Vicente  Sotto  Memorial  Medical  Center.

Napunitan  sa kapolisan   sa crime scene mao ang usa ka kabhang sa kalibre .45 nga maoy gituohang gigamit sa mamumuno pagpatay  sa biktima

Ang igsuon sa biktima nga si Marlon Casedo, dako ang pagtuo nga ang mipatay sa iyang igsuon kaila ra  nila .

Dako usab ang ilang pagtuo nga adunay kalambigitan sa gidiling drugas ang maong insidenti , tungod  kay ang kapuyo sa biktima  nga  si Victorino, nasikop man sa kapolisan tungod sa giingong pagkalambigit niini sa pagpamaligya  og gidiling drugas.

Gani, giingong gibadlong na ni Casedo ang iyang igsoon nga   mohunong  na   sa pagpamaligya  og  illegal  drugs  apan wala gayud kini niya maminaw.

Si SPO1 Victor Ruel Ayuman, imbestigador sa Homcide Section mipadayag nga mao  kini  usa sa  ilang gisubay nga anggulo sa maong  pagpamusil.

Padayon pa  ang kapolisan  sa pagpaniid  sa  kriminal  nga  mipatay  kang Pepito  aron kapasakaan  kini  og  tukmang  kiha.  (BANAT NEWS)