Polis gipusil patay

CEBU, Philippines - Namatay  ang  polis nga gipusil  sa  grupo  sa mga  lalaki  samtang  misuway  kini  og  husay   sa  mga  nag-away  atol sa  pista sa sitio Pulang Yuta, barangay Looc, dakbayan sa Danao niadtong  Biyernes  sa alas 5:00 pasado sa hapon.

Ang biktima mao si SPO3 Jose Relampagos, 54  anyos, minyo nga nagpuyo sa barangay Maslog sa maong dakbayan ug nadestino isip deputy investigator sa kapolisan sa lungsod sa Tuburan, lalawigan sa Sugbo.

Si PO2 John Bensi sa kapolisan sa Danao  miila sa mga suspetsadong  nadakpan  nga mao sila si Ronsteel  Casas, 27, nga taga barangay Dunggoan sa dakbayan sa Danao,   Roly Capin nga taga Tag-ubi sa lungsod sa Compostela ug Brave Alvaro, 19,  nga taga barangay Looc sa dakbayan sa Danao.

Ang laing tulo nga nakaikyas   mao sila Antonio Alvaro, anak niini nga si Alavaro Alvaro,  Michael Veloso ug lain pa nga tulo ka mga wala hiilhing lalaki nga nalambigit sa  kagubot sa nahisgotang dapit.

Si Police Superintendent Resty Santos, hepe sa kapolisan sa maong dakbayan maoy  miluwat dayon og kamandoan sa paggukod sa mga suspetsado   ug  diha-diha nasikop ang tulo kinsa  positibong giila sa kapuyo sa biktima.

Matud pa ni PO2 Binse  nga padulong na pauli sa  ilang  balay si SPO3 Relampagos kauban sa iyang kapuyo nga si Maria Lea Laurito,  apan sa ilang pag-abot  sa maong dapit may  pundok  sa  mga  tawo  nga  nag-away  ug  nagkagubot  busa  giduol  niini  aron  unta  husayon.

Apan  matud  pa  ni PO2 Binse nga nasuko ang maong  mga lalaki  ug  diha-diha  pipila kanila  milanit  sa ilang  armas  ug   gitabangan   og pusil si SPO3 Relampagos   hinungdan  sa  diha-diha  nga  kamatayon  niini. Ang tulo nga nadakpan nagtingkagol  na  karon  sa prisohan  samtang  padayon pang gipangita  sa kapolisan  ang  mga  kauban  niini.  (BANAT NEWS)