Nanuborno gidakop

CEBU, Philippines - Gidakop sa hepe sa Anti-Cyber Crime Group ang bise presidente sa girondang call center company human kini giingong misuway og suborno kaniya og P300 mil aron i-release ang mga computers nga gisakmit sa kapolisan.

Ang gidakop mao si Ronaldo Honrales, giingong Vice President sa External Affairs sa Interface Technophil Incorporated.

Ang hepe sa Anti-Cybercrime Group nga si Sr. Insp. Michael Virtudazo, mibutyag sa media nga giadto siya ni Honrales sa iyang buhatan ug giingong mihikyad sa iyang atubangan og binandol nga kwarta.

Tungod sa kakalit sa gibuhat ni Honrales wala makatingog si Virtudazo ug migawas ug misekreto og sugo sa iyang tawo nga pakuhaan og hulagway ang ilang panag-estorya ug ang pagtunol sa kwarta.

Human sa ilang transaksyon, giingong gipahibalo dayun ni Virtudazo si Honrales sa iyang nahimong salaod nga “bribery of public official” ug sa iyang Constitutional Rights ug gidakop.

“So with that nagulat ko siyempre. Gihatagan ko’g kwarta in exchange lagi sa computers nga na-seized namo,”matud pa sa opisyal.Lakip sa gidakop mao ang upat ka mga kauban ni Honrales nga giingong mga supervisors ug team leaders sa maong call center company.

Gibutyag ni Virtuduzo nahibaw-an nilang ang maong kwarta kagahapon pa sa kaadlawon gipadala ug na-trace kini nga gikan sa Manila ug ang receiver usa ka  Apollo Arcallana nga lakip usab sa gipasakaan og kaso human masayri nga usa kini sa mga incorporators.

Matud pa ni Virtudazo nga upat ka mga incorporators ang ilang gipasakaan og kaso nga at large tungod sa kalapasan sa RA 8484 kon Access Device Act nga silang Mathew Allan Bagley ang corporate treasurer, Hazel Weber, corporate secretary, Jeanette Honrales, Santiago Honrales ug Apollo Arcallana.

Lakip usab nga gipasakaan og kaso mao silang Riyan Manalo, Dennis Cabaguing, Rudolph Espinosa, Erwin Camarines nga giingong mga supervisors/team leader.

Samtang si Honrales gipasakaan usab 0g kalapasan sa Article 12 sa Revised Penal code (Corruption of Public Officials). Apan ang abogado sa mga dinakpan nga si Atty. Glenn Villariza, midepensa nga si Honrales mitunol sa maong kwarta sa pagtuo nga adto siya  mopiyansa alang sa mga dinakpan sa kapolisan.

Matud pa ni Villariza nga nagkaestorya sila ni Honrales nga magkita aron mapiyansahan ang mga dinakpan nilang empleyado apan nakugang siya tungod kay gilahos niya og dala ang kwarta ngadto sa buhatan sa police.

“Wala man ko ngari pagdala niya og kwarta. Iya giingnan ang pulis nga Chief para pyansa na. So, na misinterpret to sa polis. Di to bribery, wa siya mi attempt nga ihatag ang 300 thousand. Kagamay anang 300 thousand, i-bribe nimo ang pulis sa 300 thousand?" saysay pa ni Villariza.

Dugang pa ni Villariza nga imposible kaayong mahauli pa sa ilang mga kamot ang giingong computer sets nga nasakmit tungod kay nabalita naman kini.

Niadtong Huwebes sa kaadlawon, gironda sa kapolisan ang Interface Technophil Incorporated sa 2nd floor sa Keppel Building sa Samar Loop corner Cardinal Rosales Avenue human makadawat og report nga nalambigit kini sa scam ug ang biktimahon mga langyaw nga kostumer sa abroad.

Daan nang gihimakak ni Villariza sa interbyu sa dyLA sa miaging adlaw ang pasangil batok sa iyang kliyente tungod kay legitimate ug legal ang operasyon sa kompanya. (Lesley Caminade-Vestil/EIM) (BANAT NEWS)