Cebu way labot sa kagubot sa Taiwan

CEBU, Philippines - Ang  kagamhanan  sa dakbayan  sa Sugbo  nagpabiling tak-om  bahin  sa tensyon karon sa Taiwan nga usa ka sister city sa dakbayan sa Sugbo.

Kini may  labot  sa kamatayon  sa usa  ka  mananagat  nga  Taiwanese  kinsa  gipusil  sa mga  sundawo sa  Philippine Coast Guard   sa miaging  semana  didto  sa amihanang  bahin  sa  kadagatan  nga utlanan tali  sa Taiwan  ug  Pilipinas.

Ang  maong hitabo  maoy  nakapasilaob  sa kapungot sa kagamhanan  sa Taiwan  ug  gipiit  na  pag-ayo  niini  ang  mga  Filipino  nga  nanarbaho  sa maong  nasud  ug gani  mihulga  kini  nga  dili  na manawat  og trabahanteng  Filipino.

Apan si Mayor Michael Rama nagkanayon nga walay  labot  sa maong  kagubot  ang dakbayan  sa Sugbo  tungod  kay  ang  maong  kaso  hurisdiksyon sa Malacañang.

Bahin sa seguridad sa mga Sugbuanon nga tua karon  nagtrabaho sa Taiwan, dili pa makapanghilabot ang kagamhanan sa dakbayan  sa Sugbo  niini tungod kay anaay  Overseas Workers Welfare Administration (OWWA) ug  Philippine Overseas Employment Administration (POEA)  nga maoy  nag-atiman  niini.

Giklaro usab sa mayor nga dili direkta nga  malambigit  ang syudad sa Sugbo  sa maong  kaso bisan  kun sister city  kini sa Kaoshiung, usa ka syudad sa Taiwan tungod   kay  walay  direct hiring  sa  mga trabahante  alang  sa Taiwan  gikan  sa kagamhanan  sa dakbayan sa Sugbo.  Ang pagkasister city sa duha ka syudad kutob ra sa natad sa mga patigayon, negosyo, ug kultura,  sumala  ni  Rama.

Matud pa sa mayor nga dili maayo nga manghilabot ang syudad tungod kay posible lang kini nga makapasamot sa  tension.

Midugang  si Rama  nga mas maayo  nga ang OWWA ug ang POEA na  lang ang  magsabot usa   alang  sa kaluwasan ug proteksyon sa  mga Pinoy nga tua nanarbaho sa Taiwan. (/WC) (BANAT NEWS)