Family congress sa mga mag-uuma gitak-opan

CEBU, Philippines - Gitak-opan  kagabii  ang  duha  ka adlaw  nga  rehiyonal  nga  kalihokan  sa  mga  pamilyang  mag-uuma  nga  gipahigayon  sa  Hotel Fortuna  ning  dakbayan  sa  Sugbo.

Si  Teddy  E. Lozano  sa Department of Agriculture (DA)7 mibutyag  kagahapon  sa  Banat News  nga  malampuson  kaayo  ang  gipahigayon  nilang  ika-23 nga Regional  Farm  Family  Congress  and  Training  Workshop  nga  gisugdan  niadtong  Huwebes  ug  gitak-opan  usab  kagabii.

Gitambongan  sa  mga  piniling  pamilya  nga  naglangkob  sa amahan, inahan  ug  anak  gikan sa mga lalawigan  sa Bohol, Negros Oriental, Siquijor, ug  Cebu,  ang  maong  kalihokan  gipatabanan  sa  tema  nga Makugihong  Banay: Mauswagong  Panginabuhi.

Matud  ni Lozano  nga  sa maong  tigom  gihimo  ang  rehiyonal  nga bangga  sa pagpangluto  og  pagkaon,  extemporaneous speaking  kon  pagpamulong  nga  walay  tamdanan, minus one  singing contest, ug  dance  contest.

Ang  bangga    sa pagpangluto, pagpamulong, ug  awit  nga  giduyogan  sa minus  one   , gisalmotan sa  mga  batan-ong  mga  anak  sa  mga  mag-uuma  ug  sakop  sa 4H Club, samtang  ang  bangga  sa sayaw  gisalmotan  usab  sa  mga  inahan.

Ang  mga  mananaog  sa maong  mga  bangga  maoy  morepresentar  sa  Central  Visayas  sa ipahigayong  nasudnong  contest  didto  sa Puerto Princesa, Palawan,  sa  Hunyo 11, 2013  sumala  ni  Lozano.

Midugang  siya  nga  pinaagi  sa  mga  programa  sa  DA  nga  sama  niini, nabaid  pag-ayo  ang  mga  anak  sa kabus  nga  mga  mag-uuma  sa nasud  sa bisan  unsang  aspeto  sa  natad  sa edukasyon  ug  teknolohiya.

Kini  ang  usa  sa  mga  sekreto  nganong  di  mabiyaan  sa  mga  adunahang  estudyante  ang  mga  anak  sa  mga  kabus  nga mag-uuma  sa natad  sa edukasyon  ug teknolohiya, matud  pa  ni  Lozano.

Miingon  si  Lozano     nga sa duha  ka adlaw  nga  bangga  sa kahanas  ug katakus  sa natad  sa pagpangluto, pagpamulong,  pagkanta  ug  bisan  sa sayaw,  ang  mga  kabus  nga  kabataan  nga nagtubo  sa kaumahan  mipabuhagay  sa ilang  tagsa-tagsa  ka talent  nga  di bintahaan  sa  mga kabataan  nga nagtubo  sa mga  kapatagan  sama s a kalungsoran  ug  mga dakbayan.

Nagkanayon  si  Lozano  nga  ang  4H Club  sa rehiyon  7 adunay  8,324 ka membro,  nga  matag  karon ug unya  gihatagan  og  inspirasyon  sa DA  aron  mabansay  pag-ayo  sa nagkalainlaing  natad  sa panginabuhi. (/WC) (BANAT NEWS)