Delos Reyes mohatag reward sa makadakop ni Joavan

CEBU, Philippines - Ang bag-ong napiling mayor sa dakbayan sa Talisay nga si Johnny Delos Reyes mohatag og pahalipay sa makatudlo o makadakop ni Joavan Fernandez, apan  nagdumili pagbutyag kun pila.

Si Delos Reyes miawhag sa kapolisan nga padayonon ang higpit nga pagpangita ni Joavan aron masikop kini sa pagbalik.

Sa samang  higayon  iyang  giawhag si Mayor Socrates Fernandez nga  motabang   sa pagpangita sa iyang anak ug isurender sa kapolisan.

Gipasabot ni Delos Reyes nga wala siya’y kalagot kang Joavan o kang  Mayor Fernandez apan  sa pagtago-tago ni Joavan gibati siya og kabalaka tungod kay namilegro ang kinabuhi niini  busa    mas  maayo  pang  mosurender  aron maklaro  kining  buhi  sulod  sa bilanggoan.

Hinuon  matud  pa  ni  Sr. Supt. Patrocinio Comendador, hepe  sa kapolisan  sa lalawigan  sa Sugbo  nga paninguhaon  nilang  masikop si Joavan.

Kini  tungod  kay  nasiguro  nila  nga ania  ra  maglaroy-laroy  sa lalawigan  sa Sugbo  ug  wala  pa  makagawas si  Joavan.

Matud ni Delos Reyes nga inig lingkod niya sa katungdanan isip mayor sa Talisay ang kapolisan makatilaw na unya kini sa intelligence fund.

Ang mga polis nga makadakop og mga tulisan o kriminal makadawat usab unya og pahalipay, sumala  ni Delos Reyes.

Gawas niini ang bag-ong mayor nagplano sa pagpauswag sa mga ekipo sa kapolisan aron mahimo silang labing epektibo sa ilang trabaho.

Gawas niini si Delos Reyes nagplano usab nga magkuha og abogado  nga maoy molaban sa mga polis kun makasugat  kini  og problema  nga may labot  sa ilang   trabaho.

Apan si Delos Reyes mipasidaan sa mga badlongong polis nga  dili siya molaban kun  kini  makalapas  sa balaod.

Si Delos Reyes midugang nga iya  pang  giobserbahan  karon ang officer-in-charge  sa kapolisan sa Talisay nga si Superintendent Elmer Lim.

Matud   pa  niya   nga  dihang nangayo sila og tabang ni Lim niadtong eleksiyon tungod kay gi-harass sila, wala sila pakyasa niini. (/WC)(BANAT NEWS)