Kaso ni Joavan napun-an
CEBU, Philippines - Ang kontrobersyal nga anak ni Talisay City Mayor Socrates Fernandez nga si Joavan Fernandez nag-atubang na karon og kaso sa korte.
Kini human mapasaka ngadto sa korte ang labing uwahi niyang kaso nga illegal possession of firearms, illegal possession of explosives og violation of Commission on Election (Comelec) gun ban tungod sa pagdumili niya pagluwat og counter-affidavit.
Atol sa inquest proceedings nga gipahigayun ni Talisay City Prosecutor Marshal Rubia niadtong miaging semana, si Joavan miingon nga dili siya mo- file og counter-affidavit kay andam niyang atubangon ang kaso sa korte.
Si Rubia mirekomendar og P50,000 nga piyansa alang sa illegal possession of firearms, P60,000 sa Comelec gun ban apan walay bail sa explosives.
Ang maong mga kaso na-raffle na ngadto sa sala ni Judge Soliver Peras sa Regional Trial Court (RTC) Branch 10.
Kahinumduman nga niadtong Mayo 6 gidakop si Joavan sa mga sakop sa Talisay City Police ubos sa mando ni Municipal Trial Court in Cities (MTCC) Judge Mario Manayon tungod sa wa pagtambong sa anak sa mayor sa iyang hearing sa kasong slight physical injuries.
Apan wala siya mapresentar sa korte human kini miikyas gikan sa prisohan sa Talisay City Police Station ug padayong gawasnon karong mga orasa.(/EIM) (BANAT NEWS)
- Latest
