Swiss national napalgang patay

CEBU, Philippines - Usa  ka langyaw ang napalgang patay sa iyahang asawa sulod sa ilang kwarto sud sa ilang balay sa barangay Basdiot sa lungsod sa Moalboal kagahapon sa alas 9:00 sa buntag.

Giila sa kapolisan ang napalgang patay mao ang Swiss national nga si Ulrich Rene Vonaesch, 56,  kinsa dunay kapuyo nga si Gail Anne Fernandez, 26,  taga lungsod sa Badian ug diha na ang duha magpuyo sa maong dapit.

Matud ni PO2 Romeo Legaspi Jr., sa Moalboal Police Station sa pakighinabi sa Banat News, bag-ohay pang nauli si Fernandez gikan sa iyang lakaw ug naabtan niining nagbuy-od na sa higdaanan si Vonaesch ug wala nay kinabuhi.

Dali siyang mitawag sa kapolisan apan nasuta nga patay na gyud kini. Girekomendar sa kapolisan ang pagpa-awtopsiya sa lawas sa langyaw aron matino ang hinungdan sa kamatayon niini. (/EIM) (BANAT NEWS)