PNoy dako’g papel sa kadaogan sa LP

CEBU, Philippines - Ang hugot nga suporta ni Presidente Benigno Aquino III maoy gituohang hinungdan sa pagpangharos sa halos tanang mga kandidato sa Liberal Party( LP) dinhi sa Sugbo  sa eleksyon niadtong Lunes.

Mao kini gibutyag ni acting governor Agnes Magpale atol sa pagbisita niini sa canvassing center sa Capitol Social Hall kagahapon sa hapon. Pagkakaron si  LP gubernatorial bet Hilario Davide III naglawig na sa kadaugan human molabaw  ang  boto  niini og  kaping 150 mil botos  batok ni One Cebu candidate Pablo John Garcia.

Samtang si Magpale milubong   usab og kapin  sa 100,000   nga  boto  batok  sa  iyang kaatbang nga si Glenn Soco  ug Boboy Durano.

Matud ni Magpale   nga gikan sa pagsugod sa kampanya hangtud na sa pagkatapos,  unom gyud ka higayon nga gibisitahan  ni Presidente Aquino ang Sugbo ug gipangunayan   niini  sa  pag-endosar  ang tanang LP candidates.

Dugang ni Magpale nga laing hinungdan  mao nga nakasabot na karon ang mga Sugboanon ug mipili na kini sa mga kandidato nga tinuoray ug tarung mo-serbisyo.

Nunot niini gipasalig ni Magpale nga himoon  niya  ug  sa umaabot nga  gobernador  Davide  ang tinarong  nga serbisyo  sa  mga  Sugboanon  aron makatagamtam  kini  ug  makapatagbaw  nga  pangalagad.

Giklaro ni Magpale nga wala silay pili-on ug labaw nang wala silay tinguha nga gukdon ug manimawos sa ilang mga kontra partido.

Nasayran nga gawas nilang Davide  ug Magpale daghan usab ang ilang mga kandidato pagka- board member sa unom ka mga distrito sa Sugbo   nga  midaog  usab  niining  eleksyona.

Kini wala pay labot sa mga kongresista ug mga mayor ug bise  mayor sa kalungsoran ug dakbayan   nga ania  sa lalawigan   sa Sugbo. (BANAT NEWS)