Gidaghanon sa mga nangalumos karong bakasyon nimenus

CEBU, Philippines - Duna’y pagkunhod sa kaso sa nangalumos ang natala sa kapolisan sa Sugbu sa  panahon sa ting-init sugod niadtong Marso hangtod sa buwan sa Mayo ning tuiga itandi sa mga natala sa nilabay’ng tuig base sa talaan sa Cebu Provincial Police Office.

Ang rekord nagpakita nga sa buwan sa Marso karong tuiga duha lang ang nalumos itandi sa pito nga nangalumos sa samang bulan sa milabay’ng tuig.

Ning buwan sa Abril upat ka mga kaso sa pagkalumos ang ilang na-rekord itandi sa siyam nga natala sa miaging tuig.

Samtang sa unang semana niining bulan sa Mayo misaka ang gidaghanon sa mga nalumos nga miabot og lima kun itandi sa  tulo ka mga nalumos sa susamang buwan sa milabay’ng tuig.

Nasayran usab nga kasagaran niining mga kaso sa pagkalumos anaa mahitabo sa dagat nga nag-unang mga lugar nga bisitahon sa mga tawo panahon sa ting-init. Sigon ni Philippine Atmospheric Geophysical Astronomical Services Administration (PAGASA) Weather Observer, Boy Artiaga nga gikahinabi sa Banat News nga “light to moderate” lang ang pagbalod sa dagat karon nga summer.

Apan si Niel Angelo Sanchez sa Provincial Disaster Risk Reduction Management Council mibutyag sa Banat News nga dili lang ang kondisyon sa dagat ang hinungdan nga dunay mga nangalumos.

“Factors ana niya can range from different causes, di kahibalo molangoy, not only dagat but even mga bodies of water like lake or waterfalls. There are areas nga dli siya fit for swimming there were instances nga kusog ang current sa dagat, or sa falls, duna’y under-draft (daw suyopon pailawom) and these are areas nga angayan butangan og saktong signages nga not for swimming,” matud pa ni Sanchez.

Laing hinungdan sa pagkalumos matud pa ni Sanchez mao nga pagsawom nga busog maong bikogan; hubog; iresponsableng pagbantay sa mga bata. “So the manner of drowning varies,” asoy ni Sanchez.

Nasuta usab sa record nga mas daghang mga lalaki ang nangalumos kun itandi sa mga babaye.  Matud ni Sanchez tungod kini sa kadako og pagsalig sa kaugalingon sa mga lalaki kun itandi sa mga babaye.

“Kung naka-inom na confident kaayo nga molangoy. No matter how good a swimmer you are if you have underlying factors like for example duna kay sakit sa kasingkasing daan or maybe you are under the influence of liquor, mawagtang man gud na siya,” pasabot pang Sanchez.

Tambag pa ni Sanchez sa publiko, kinahanglang mopatuo sa mga lifeguards, sundon ang mga signages, ug bantayan ang mga bata, dili magpatara ug timan-an ang limitasyon.

“As  far as safety is concern ato nang sundon, let’s not ignore that,” pasidaan pa ni Sanchez. (BANAT NEWS)