Mga kagubot wa makabalda sa eleksyon–PRO7

CEBU, Philippines - Ubay-ubay ang na-report nga mga insidente sa probinsya sa Sugbo sugod niadtong Mayo 10, apan wala kini makabalda sa gipahigayong eleksyon sa miaging Lunes sumala pa sa kapolisan.

Base sa natigom nga report sa Police Regional Office 7 kagahapon, ang syudad sa Sugbo ang dunay kinadaghanan og mga tawong naaresto sa liquor ban, apan walay bisan usa ka report nga election related violence. Ang report sa PRO-7 nga nadawat naglangkob sa vote buying, gun ban, pagpamusil, pagpangrakrak, mga nasakmit nga explosives, engkwentro sa mga armadong tawo, pagpangguba sa mga kabtangan sa gobiyerno, ug power interruption.

Dunay 13 ka tawo ang nadakpan sa gun ban sukad Mayo 10 kutob Mayo 13, maong miabot na og 272 ka tawo ang naaresto sa maong kalapasan sukad sa pagsugod sa election period niadtong  Enero 13. Mokabat sa 249 ka mga armas ang nasakmit, 265 sa nadakpan mga sibilyan, lima mga opisyal o empleyado sa gobiyerno, ug duha mga pulis. Ang kapulisan nakasakmit usab og 1,204 ka mga bala, hait na mga hinagiban, explosives, ug mga firearm replicas.

Kapin kun kuwang P100,000 usab nga salapi ang nasakmit gikan sa mga nadakpang vote buyers, 36 ka tawo ang nadakpan sa liquor ban,  15 niini sa syudad sa Sugbo, 10 sa probinsya, siyam sa Bohol, ug tagsa sa siyudad sa Mandaue ug Lapu-lapu.

Si Senior Supt. Edward Carranza, ang Regional Chief of Directorial Staff sa PRO 7, ang miingon nga tungod sa mga pag-aresto nagpasabot lamang nga naglihok gyud ang kapulisan.

Si Carranza midugang nga ang pagpahigayon sa eleksyon kay generally peaceful ug hapsay tungod sa mas higpit nga koordinasyon tali sa Comelec, Armed Forces of the Philippines, Philippine National Police, ug sa civil societies. (BANAT NEWS)