“I shall return”-Annabelle Rama

CEBU, Philippines - Wala magmahay ang Sugbuanong talent manager Annabelle Rama bisan pa man og napildi siya sa kaatbang nga beteranong kongresista Raul del Mar kinsa giproklamar nga mananaug kagahapon.

Determinado si Annabelle nga mopadayon sa iyang interes sa politika.

Pipila ka oras sa wala pa giproklamar si del Mar, si Rama miluwat og pamahayag pinaagi sa microblogging site Twitter.

Iya nang gi-congratulate daan ang iyang kaatbang ug mihatag og mga sugyot sa pagserbisyo sa norte distrito sa dakbayan sa Sugbo.

“To my opponent, congratulations sa iyo. Nakita ko ang kahirapan sa iba’t-ibang parte ng Cebu North District. Sana sila ang unahin mong tulungan. Yung pork barrel gamitin mo sa tama. Maawa ka naman sa kanila,” siya namahayag.

Dugang niya, wala siya magmahay sa iyang kasinatian sa milabay’ng unom ka bulan diin iyang nailhan og maayo ang mga Sugbuanon labi na ang mga taga north district.

“It’s not the end of my political career. I shall return. Di pa tapos ang aking adhikain. Serbisyo dili negosyo,” matud ni Annabelle.

“Asahan nyo mga kababayan ko sa Cebu. Di pa tapos ang pagtulong ko sa inyo,” siya midason.

Sa susamang Twitter post, gi- congratulate usab niya ang iyang ig-agaw nga napili pag-usab pagka-mayor, Michael Rama sa pag-ingon: “matutuloy na niya ang mga projects na sinimulan niya na mas magpapaunlad sa Cebu City.”

Si Annabelle mibalhin pagparehistro sa norte distrito sa dakbayan uban sa iyang artistang bana Eddie Gutierrez ug ilang mga artistang anak lakip si Ruffa ug Richard.

Sama sa iyang saad, nagbaha ang artista atol sa ilang kampanya apan wala kini makatabang sa iyang kadaugan.  Napildi si Annabelle sa iyang kaugalingong presinto sa barangay Zapatera diin nakakuha lang siya og 69 ka botos samtang si del Mar 174.

Sa wala pa giproklamar si del Mar, ang labing uwahing ihap sa boto mitala   ang beteranong politiko  og 134,180 samtang si Anabelle 35,842 votes. (BANAT NEWS)