Tag-iya og junkshop gitangkugo pagpusil patay

CEBU, Philippines - Patay ang usa ka negosyanteng lalaki nga nagpalimpiyo sa iyang kuko sa  sulod sa beauty parlor sa barangay  Paknaan, dakbayan sa Mandaue alas-11 pasado ang takna sa buntag kagahapon.

Si PO2 Heraclio Gamboa  sa kapolisan sa Presinto 3 sa Mandaue City Police Office  (MCPO) miila sa biktima nga mao si Wilfredo Bragolas, 56, tag-iya og junkshop nga taga  Purok  Tambis sa barangay Paknaan sa maong dakbayan.

Wala pa mailhi sa kapolisan ang mamumuno nga giingong nipalit pa og sigarilyo sa tindahan duol sa parlor ug gisud ang biktima dayon mipusil niini sa tangkugo. Patay na kini pag-abot sa tambalanan.

Si Gamboa miingon nga ang suspetsado dali kaayong nakasibat pahilayo sa maong dapit. Padayon pa ang imbestigasyon sa maong kaso apan gisalikway nang daan ang kalambigitan sa politika sa maong pagpamusil sanglit ang biktima wala man usab malambigit og politikanhong kalihokan sa miaging piniliay. (BANAT NEWS)