Eleksyon 2013: Generally peaceful-COMELEC

CEBU, Philippines - Way mga dagkong kakulian gawas lang sa mga ‘minor glitches’ sa mga depektosong precinct count optical scan (PCOS) machines nga nasugatan atol sa eleksyon kagahapon.

Mao kini pangangkon ni Commission on Elections chairman Sixto Brillantes Jr. ug ingon man sa security forces.  "Our overall assessment as of now , ok lang. Walang problemang major," matud pa ni Brillantes sa briefing kagahapon.

Giingong adunay 100 ka PCOS machines ang nangapalyar apan ang Comelec nangandam nang daan nga 200 sa 78,000 ka PCOS machines ang mopalyar. Ang 100 ka PCOS machines nga palpak mas gamay lang kun itandi sa mikagar nga 400 sa 76,000 PCOS machines niadtong unang automated elections.

Bisan pa man sa mga problemang mitumaw way gihatag nga extension ang Comelec. Karong adlawa alas-10 sa buntag mag-convene ang National Board of Election Inspectors.

Samtang ang tigpamaba sa Philippine National Police, Chief Supt. Generoso Cerbo Jr. miingon nga tanang nasugatang problema naatiman dayon sa mga awtoridad.

Sayo pa lang kagahapon sa buntag, miabot na og 3,185 ka tawo ang nadakpan tungod sa gun ban ug ubang election laws. Nasuta nga 157 niini mga nadakpan tungod sa liquor ban.

“Generally as of this time (4:15 p.m.) electoral process goes smoothly although early stages minor problems were encountered however, these were all addressed by our precinct count optical scan (PCOS) technicians,” matud pa ni Cebu Provincial election supervisor Eddie Aba.

Naglaom si Aba nga karong adlawa matapos na ang canvassing ug transmittal sa resulta.

Susamang problema ang nasinati sa Mandaue ug Lapu-lapu City gawas lang sa komosyon nga nahitabo sa Punta Engaño Elementary School dihang ang supporter ni Liberal Party mayoralty candidate Efrain Pelaez ug supporter ni LP congressional candidate Angel Rodriguez nagkasungiay.

Sa Mandaue, gihulagway ni MCPO Director Petronelli Baldebrin nga malinawon ang eleksyon sa siyudad.

Samtang sa Talisay City, nabantayan usab ang pipila ka aberya sa mga PCOS machines.  Matud ni Rev. Jess Primacio, ang spokesperson of Pagbabago! Cebu, miingon nga dunay mga botanteng namauli kay wala ilang pangalan sa listahan sa mga botante.

Si Comelec-7 Regional Director Temie Lambino miingon nga gipaabot nilang dunay madeklarar nga mananaog sa local candidates kaganihang tungang gabii.

Si PRO-7 police director, Chief Supt. Marcelo Garbo mibutyag nga mas daghan silang nadakpan karon nga eleksyon kun itandi sa nakalabay nga piniliay nga timaan lang nga malampuson ang pagpangandam nga ilang gihimo.(Brenda Batuto, Romeo Limpangog, Ray Anthony Espedido, Kristianne Marie Alcaria,CNU Interns uban sa report sa The Freeman/EIM) (BANAT BALITA)