Kandidatong namatay gipulihan sa asawa

SIQUIJOR, Philippines --Kandidato sa pagka-kongresista sa Siquijor nga giatake sa sakit ug namatay atol sa bisperas sa eleksyon diha sa Larena, Siquijor gipulihan sa iyang kapikas.

Si Dr. Marie Anne Serrano Pernes, 48, maoy mipuli ni Dr. Jose Jay Samson Pernes, 49, nga taga Nonoc, Larena, Siquijor kinsa namatay niadtong Domingo sa gabii, bisperas sa eleksyon.

Si Marie Anne misumitir sa iyang certificate of candidacy sa Comelec kagahapon alas 9:10 sa buntag (adlaw sa eleksyon) nga gikuyogan ni Secretary Joel Rocamora sa National Anti-Poverty Commission.

Ang election assistant nga si Ailen Cenas mibutyag sa The Freeman-Banat News nga gi-fax na nila ang kopya sa COC didto sa kaulohan ug ipadala na lang ang orihinal nga kopya sa mga dokumento pinaagi sa koreyo.

Si Dr. Christiansen Sevilleno, ang doctor nga niatiman kang Pernes nagkanayon nga patay na kining nalandig sa tambalanang probinsyal sa Siquijor. Sumala pa ni Sevilleno nga zero vital sign na si Pernes .

Wala hinoon siya mobutyag kung atake sa kasingkasing apan nidako ang tuong bahin sa dughan ni Pernes.

Si Dr. Rhea Pal-ing sa lungsod sa Enrique Villanueva ang nagcheck-up kang Pernes anang buntag apan si Dr. Susan Jojie Villa sa lungsod sa Larena, kinsa kauban sa grupo maoy mitabang pagkahapon aron madala sa tambalanan.

Si Pernes, kandidato pagka kongresista ubos sa Liberal Party kaatbang ni Orlando Fua, Jr. sa partidong Lakas Kampi-CMD.

Gitun-an na sa partido kung kinsay mohulip kang Pernes. Si Dar Lynn Honrubia, usa sa mga midagan pagka provincial board member ubos sa maong partido sa pakighinabi sa The Freeman igsuong pamantalaan sa Banat News misulti nga padayon gihapon ang laban ug nga mao nay panahon sa mga taga Siquijor nga mopadayon sa kabag-ohan tungod sa pagbuhis og kinabuhi ni Pernes.

Ang plataporma ni Pernes mao ang pagpalambo sa turismo, kahimsog sa panglawas, mapalambo ang negosyo ug daghang trabaho sa Siquijor.( /EIM)  (BANAT NEWS)