PCOS machine sa norte ug south mikagar

CEBU, Philippines - Nakasinati og kalangay ang pagsugod sa botasyon  kagahapon  didto  sa  mga  lugar  sa amihanang  bahin  sa lalawigan  sa Sugbo gumikan   sa pagkagar  sa pipila  ka mga  Precinct Count Optical Scan ( PCOS) machine.

 Ang mga  lugar  nga  apektado  ning  maong  mga  problema mao  ang dakbayan sa Toledo,  ug  mga  lungsod  sa  Pinamungahan, Aloguinsan, Alegria ug Bantayan Island ug uban pa.

Sa  Toledo  naaberiya  ang  PCOS  machine sa Precinct 4 sa South City Central School  hinungdan lapas  na sa alas 8:00  sa buntag  nakasugod  og  botar  ang  mga  botante  didto.

Gani  si Toledo City Election Officer  Marchel  Sarno  kinsa  mituyo  pagsil-ing  sa maong problema  mitug-an   atol sa interview sa Bantay  Radyo nga  ila  dayong  gipailisan  ang  maong  makina  sa PCOS.

Samtang  sa Precinct 2 sa mao gihapong eskuylahan  naundang ang  botasyon mga alas 7:30 kay  miaso ug nasunog  ang  PCOS  machine  didto  human  paslaki  sa unom  ka nagsunod  nga  mga  balota.

Apan  matud  pa  ni  Sarno  nga  sa dihang  ilang gitestingan  ang  maong  makina, nahibalik  kini  sa normal  nga  kahimtang  ug  nakapadayon  sa  pagdawat  sa  mga  gihungit  nga  mga  balota  apan  nalangay  gyud  og  pipila  ka  minuto  ang  botasyon  sa  maong  dapit.

Gihan-ok  sa  technician  ang  maong problema  ngadto  sa kinaiyahan  tungod  kay  gikan  sa Manila  ang  maong  mga  makina  ug  ang  kataas  sa biyahe  niini  nahimong  hinungdan  sa  pagkagar  niini  og  makadiyot.

Samtang didto   usab sa presinto sa Tajao Elementary School sa lungsod sa Pinamungahan alas 8:00  pasado  na  usab  nakasugod og  botar  ang  katawhan  tungod  gihapon  sa pagka-aberiya  sa ilang  PCOS  machine.

Ingon  usab niini  ang  nahitabo  didto  sa barangay Bonbon,  Aloguinsan  sa mga presinto 15A, 15C, 16A,17A, 17B ug 18A.

Ang BEI chairman sa Aloguinsan  nga si Bayani Gonzales mibutyag  sa Banat  News nga kalit lang mipalyar ang mga  PCOS machine sa nahisgotang  mga  presinto  ug  nagdumili  pagdawat  sa  mga  gipaslak  nga  mga balota .

Apan  nasalbar  ang  botasyon  sa maong  mga  lugar  dihang  gipang-ilisan  dayon  sa  PCOS  technician  ang  mga  depektosong  makina  gikan  sa  mga  reserba  niini nga  gipundo  sa buhatan  sa  Provincial Comelec Office.

Laing  PCOS  machine  nga  mikagar  mao  ang  didto  sa Sulangan Elementary  School  sa lungsod  sa Bantayan, Isla  sa Bantayan.

Maayo  na lang  kay  may  mga  reserbang  makina  sa PCOS  ang  lalawigan  nga  maoy  gipuli  dayon  niadtong  mga  nadaot  nga  PCOS. (/WC) (BANAT NEWS)