Mga botante sa Punta Engaño nagkagubot

CEBU, Philippines - Gumikan sa pagtinutokay  nga  pabikil  sa  mga  suporter  sa magkaatbang nga  kandidato   sa dakbayan  sa Lapulapu  nagubot  makadiyot  ang  piniliay  sa   Brgy. Punta Engano   sa  maong dakbayan   kagahapon. Kini  pinaagi  sa  naglamok-lamok   nga  gihimo tali  sa  mga supporter ni LP mayoralty candidate Efrain Pelaez ug Congressional  candidate Angel Rodriguez.

Matud pa ni Lapulapu City Police Office Chief  P/SSupt. Rey Lyndon Lawas  nga ang nag-away mao si Jastine Rasta nga dumadapig ni Pelaez ug  Roco Iyas, nga dumadapig ni LP congressional candidate Angel Rodriguez.

Nasuta  nga nasuko  si  Iyas   kay  hait  kuno  kaayo  og  tinutokan  kaniya  si Rasta  busa  nagbinukbokay  sila.

 Hinuon  pag-abot  sa SWAT  team  sa kapolisan  nasanta  dayon  ang  maong  kagubot.

 Samtang  usa ka guwardiya sa Pusok National High School giimbargohan og armas samtang nagbantay sa kahapsay sa eleksiyon sa maong dapit.

Ang  maong  guwardiya  giila  nga  si Joselito Cabrillas, hingkod, ug  ang  milabni  sa iyang  service  firearm, mao  ang  giingong  liso  og  pangisip  nga  si  Nelson Igot, hingkod nga  taga  sitio  Matumbo,  barangay  Pusok. Hinuon  nabawi  ra  ang  maong 38 kalibre  nga  revolver pinaagi  sa  abag  sa  mga  kapolisan sa maong  dakbayan.( /WC)  (BANAT NEWS)